雅虎香港財經 操盤手札記│買收息股 息率起碼要幾多厘（割柑人）
避過衰退？上周五出爐嘅美國2月ISM服務業PMI報55.1，高過預期嘅54.5；市場重視嘅新訂單指數升至62.6，係2021年11月以嚟最高；服務就業指數亦升至54，係2021年12月以嚟最高；被視為預測PCE通脹指標嘅服務價格指數雖然放緩，但仍高企於65.6。此外，2月Markit服務業PMI終值報50.6，高過初值嘅50.5。美國服務業業務活動喺2月恢復增長，係8個月嚟首次，抵銷製造業產出下降，有助穩定經濟，避免首季衰退。
美股外幣即時報價 多國新聞任睇
數據出爐後，美債孳息回落，10年期債息未能突破4.1厘，更跌穿4厘，收3.96厘；美滙指數跌穿105，收104.53，跌0.5%；美股延續升勢，道指、標指、納指分別收升1.2%、1.6%、2%。追蹤美國上市中概股表現嘅納斯達克金龍中國指數收升1.5%；港股ADR比例指數高水0.3%。值得注意嘅係，上周五聯儲局發布半年度貨幣政策報告，報告指出，核心服務業通脹仍高，持續加息係必要之舉；不過，市場已大致price-in呢個因素。
曙光初現 港股反彈料未完
代表就業市場嘅服務業通脹仍高，反映勞動力市場仍緊張，工資增長壓力將會引發潛在通脹壓力。通脹可分：現時通脹、通脹預期，後者比前者更重要，因後者往往係導致通脹嘅重要原因！美國通脹預期——未來5年嘅5年期平衡通脹率，已快速回升兼突破過去1年嘅降軌，儲局會維持力度不足嘅緊縮政策，抑或加大力度，成為金融市場不明朗因素。本周五公布嘅2月非農就業數據，將有更多線索。
睇返港股，上周五，中國政協、人大兩會召開前夕，恒指喺外圍造好帶動下反彈0.7%，收20567；以全周計，反彈2.8%。睇周線圖，係連跌4周兼4枝陰燭後以陽燭反彈；而且，上周嘅陽燭同前周嘅陰燭組成「曙光初現」利好轉向形態，預料本周繼續反彈，有望上試2月9日高位21600水平，下方支持為上周低位19800水平。港股本月若要反彈超越1月高位22700水平，則要兩會有好消息配合。
長和系中 長和派息惹憧憬
隨着美國利率峰值上移——市場預計6月將達5.5厘，然後維持至年底；加上早前領展（823）以相當於6.4厘息供股，折射了企業向機構大戶融資嘅息口價碼，對同業嘅借貸成本具有一定指標性，如果閣下係鍾情收息股嘅食息族，就要留意息率定價。由「以息定價」嘅指標嚟睇，收息股就算冇6.4厘息，起碼都要有6厘息，或者盈利有上升動力嚟推升每股派息，否則股價有回調壓力。
長和系正陸續公布2022年度業績，當中，和記電訊（215）、置富產業（778）已分別於上周二、四派成績表，派息都符合預期；以現價計，和電股息率為6厘，置富股息率為6.4厘。長和系中，下周四派成績表嘅長和（001），派息最有增長憧憬。據彭博綜合券商預測，長和每股盈利料增2%，每股派息料增5%至2.798元，相對和電派息持平，置富派息少2%，而預期長實（1113）、長建（1038）派息分別增3%、1%，預期電能（006）、港燈（2638）派息持平，長和增幅最高。
割柑人
本欄逢周一刊出
