雅虎香港財經 操盤手札記│通關不離食買玩（割柑人）
過幾日就聖誕，近日響徹歐美嘅歌係：「You'd better watch out, you'd better not cry, you'd better keep cash I'm telling you why, recession is coming to town.」上周，一日之間，美國、英國、瑞士、歐洲央行相繼加息0.5厘，市場憂慮全球繼續加息，加上歐美12月製造業、服務業同綜合PMI初值都低過50盛衰分界線，美國PMI數據更低過預期，經濟衰退風險加深，歐美股市連跌3日。上周五，泛歐STOXX 600指數跌1.2%；美股三大指數跌0.8%至1.1%；港股ADR比例指數低水140點或0.7%。
美股外幣即時報價 多國新聞任睇
美國聯儲局連番加息，不惜犧牲經濟遏制通脹，雖然通脹似已見頂，商品通脹回落，住房通脹亦回落，但不含住房嘅核心服務業通脹仍高企。核心中嘅核心，係服務薪酬增長！雖然科網，運輸等企業大幅裁員，但就業市場仍緊張。月初公布嘅11月非農新增職位連續8個月高過預期，平均時薪按月升0.6%、按年升5.1%，都高過預期，皆因：①逆全球化令企業回流；②過去投資不足嘅服務業如娛樂、醫療等人手緊絀。儲局鮑Sir話齋：「加息還有一段路要走。」
中經會首務擴大消費
歐美面臨經濟衰退，作為貿易夥伴嘅中國亦受影響。事實上，今年以嚟，中國對美國出口佔總出口比重，由年初嘅17.1%跌至15.7%，體現美國加息及其關聯因素對需求嘅抑制作用；此外，中國對歐盟出口佔總出口比重，更由年初嘅17.9%跌至14.6%，跌幅大過美國，體現歐洲通脹高企、能源危機等因素對中國出口嘅拖累。東盟可能成為未來中國出口嘅重點，但東盟產業鏈重構高峰期已過，外需持續性可能減弱。
中國面對經濟下行，上周四、五，中央經濟工作會議話延期又如期召開。會議要求，「明年要堅持穩字當頭、穩中求進，繼續實施積極的財政政策和穩健的貨幣政策，加大宏觀政策調控力度。」又指「要從戰略全局出發，一是着力擴大國內需求，要把恢復和擴大消費擺在優先位置；二是加快建設現代化產業體系；三是切實落實『兩個毫不動搖』，要深化國企改革，支持民企發展；四是更大力度吸引和利用外資；五是有效防範化解重大經濟金融風險。」
金融產品吸引內地客
中經會訂定明年經濟目標同政策，係大戶部署嘅指標。上周會議期間，中港股市受外圍影響，反彈乏力，聖誕前料橫行居多。不過，上證綜指同恒指都似係升破頭肩底頸線嘅後抽走勢，完成後抽後有機會再展升浪。恒指上周五收19450，後抽或回試頸線18500水平，完成調整後或上試8月橫行區頂部阻力20300水平，中期頭肩底量度目標為22200水平。中港通關消息，可望成為大市催化劑。
特首李家超上周四晚喺Facebook同微博發文稱，中港明年有望落實通關。翌日，《南華早報》引述消息人士稱，中港預計下月全面通關。另外，停駛近3年嘅廣深港高鐵，據報最快下月初恢復來往廣東服務。若農曆新年前通關屬實，主要受惠嘅不離食買玩相關股份，如旅行社、航空公司、酒店、食肆、購物商場；此外，保險商、銀行亦受惠，因香港金融產品對内地遊客具吸引力。
割柑人
www.fb.com/hkstockpicker
本欄逢周一刊出
