雅虎香港財經 
【新鮮出爐】「極品」老闆排行榜
衰老細無處不在，但究竟邊種老細最乞人憎？外國求職網站Comparably早前訪問了逾2000名打工仔女，並按調查收集嘅數據，列出最人見人憎嘅5種衰老闆特質。唔知打工仔女們嘅老細乞人憎排名，又係第幾呢？
第5位：無耐性（9%）
凡事都要「馬上」、「立即」辦妥，總之一要佢等就會發火，但下屬唔係神仙，無可能上一秒聽到要求，幾秒後就搞得掂。見到呢種老細，肯定會好焦慮同不安，仲邊有精神開工喎。
第4位：自以為是（14%）
經常將「嗯，這一切我都知道」掛在嘴邊，很愛炫耀自己知識有多廣博。對住死剩把口嘅老細，做下屬嘅恐怕無乜安全感，成日驚住自大嘅佢會累自己孭鑊。
第3位：欠缺組織力（16%）
時常亂放文件，唔太會整理東西；常用Memo紙記低事情，轉個頭卻可能忘記了，反正不斷製造麻煩俾手下就是。整體而言，其討厭程度排第3位，但年輕嘅Z世代（18歲至25歲）打工仔卻最憎呢種「極品」老細。
第2位：過度挑剔（22%）
對人永遠有彈無讚，仲鐘意大大聲咁彈，當眾落員工面子，試問有幾多打工仔女受得了？值得留意，特別多女工友好憎呢類「極品」老細。
第１位：管得太多（39%）
事無大小都要管要理，常常查問員工嘅工作進度；若唔按佢嘅方法去做，就要重新做過。做呢種「極品」老細手下，有種整日都被監視嘅不安感覺。
調查亦發現，受訪嘅Entry level低級職員當中，最受不了自以為是嘅老細（25%）。咁都正常嘅，跟住一個只識懶叻、經常忘東忘西嘅老細，卻要成日附和佢，想象一下都覺得難頂啦。
來源：Comparably
===================
19網輕鬆爆料熱線，歡迎舉報老細同事19惡行，立即click入去講畀我哋知啦
