雅虎香港財經 智取大市｜中國樓市四大後遺症 「認錢不認房」時代遠未終結｜晉佳
碧桂園（2007）業績喺剛過去嘅星期四出爐，半年毛虧損242.6億人民幣、核心淨虧損453.5億人民幣，住宅單位賣一個、蝕一個，經營業績比想像中更惡劣。業績顯示碧桂園命運幾近蓋棺，更重要係，上網識睇睇留言，個個大陸網民話千祈唔好買期房，要買就買現房、二手房，咁嚟緊邊有人幫碧桂園嘅期房做接盤俠？
即使最新消息話碧桂園有債券能夠展期，但基本上救得都嘥藥費。問題係，民企內房龍頭連環爆雷，中國大陸嘅樓市未來會發生甚麼事？以下只係簡單列出幾個實質情況、未來好大機會發生嘅後遺症：
一）由於民企內房早年瘋狂借錢買地，令供應以剎唔到車嘅速度繼續大量增加。根據國家統計局數據，今年1至7月住宅竣工面積仍按年升20.8%，雖然新開工面積按年減少25%，但新開工面積（4.15億平米）仍然遠多過竣工面積（2.8億平米）。即係話，未來住宅竣工面積仍會一年多過一年，樓價下跌同時供應不斷增加，整體樓價壓力好明顯會剎唔到車。準買家明知未來供應增多，會形成「遲買平幾萬」嘅心態，一路將剛需推遲；一線城市情況冇咁嚴重，而民企內房近年存貨集中三四線樓市，成為佢哋嘅最大死因之一。
二）民企內房爆煲，未來買家對於民企信心不足，準買家買樓會偏向買現樓，影響民企內房未來套現及周轉能力。民企加入內房行業嘅吸引力亦會大減，減低行業進化能力。
三）勉強保交樓將會衍生住宅建築安全問題，長遠同樣令買家對於民企內房嘅項目信心減弱，反而國企更能為買家帶來信心。
四）然後，樓市由國企內房主導，削弱市場力量，只會令樓市復元能力更低。
舊年爛尾樓打擊準買家信心，情況唔止三四線樓市，所謂嘅「新一線」樓市，都面對同樣情況。未來可以預期，較佳劇本係一線城市北上廣深仍有機會回穩，其餘城市不要指望可見將來能夠復蘇了。
如恒大（3333）之流，淨負債比率老早已去到300%樓上，存貨集中三四線城市，老早預見會出現大問題；至於有如旭輝（884）之類普通民企內房，賬面債務水平安全，但表外債足以不明不白地一下子拖冧公司。民企內房嘅零防守自殺式經營模式，當初亦有內銀配合批出貸款加劇高槓桿問題，唔係一朝一夕嘅事。唔好期望整個體制會有解決問題嘅前瞻性，因為，前瞻性喺早幾年應該出現嘅時期，都從來冇出現過。所以，甚麼「認房不認貸」，睇怕市場最終都不買賬了。
https://www.facebook.com/advanceguy1
註：專欄作家言論不代表本網立場
