香港股市 將收市,收市時間:19 分鐘

會考零分 36歲裸辭20萬創業 爽WiFi年生意額達2000萬|創業個案

創業

DSE放榜,今年一共誕生9位狀元!有考生考到好成績、也有考生失手成續未如理想。無論如何,DSE只是人生中其中一場考試,即使讀書不成,也絕不能「一試定生死」。當年會考零分的Michael就是個活生生的好例子,他於3年前裸辭,利用20萬創立『爽WiFi』,短短3年間由首年100萬營業額做到去年2,000萬營業額,誇張的增幅令人張口結舌!

撰文:Hody | 攝影:何柏基

延伸閱讀:

大學生未畢業先創業 研製微型港式小食 | 創業新力軍

中美貿易戰爆發 買樓有價講 樓市率先跌3% | 香港樓市2018

36歲裸辭創業

自言出身低微、無家底、無人脈的Michael,原本在電訊業由前線Sales做到管理層,2014年10月某天,他決定裸辭,因為有感事業已無起色。

他坦言當日裸辭後「唔知做咩好,但發現日日喺屋企唔掂!」他覺得自己不會再搵工,一定要諗做生意!

他說:「我讀書少、只得經驗,我可以做到幾多歲?」他深知自己的長處弱項,但因為自小已好想自己做生意,所以3年前即使從未接觸過WiFi蛋生意,也不顧一切的衝出去創業!

爽WiFi DSE 會考 創業 Wifi蛋 Michael

中學收人100蚊抄校規 但俾5蚊另一個人幫我抄

現今不少都年輕人「有父幹有母幹」,就連上車都有父母幫助俾首期,非常「幸福」!

然而Michael的童年就過得一點也不容易,Michael指自幼家景窮困,小時候經常有「收數佬」到家拍門,又不時有「收數佬」接他放學,「細個住土瓜灣,中一開始爸爸媽媽抽到公屋上到樓住粉嶺,但喺何文田返學,試過阿媽冇錢俾我返學…」

他笑稱:「我由中一二已開始諗辦法點樣可以搵錢,例如幫同學抄校規,我已經識得收人100蚊抄校規,但就俾5蚊另一個人幫我抄…又試過叫啲有錢同學仔帶飯時煮埋我飯,叫佢同阿爸講煮多啲俾我,盡量令自己返學唔使用錢!」記者聽到此處忍不住大笑。

的確,生活過得不容易,不單令他自小已培養出獨立性格,同時也培養出不一樣的生意頭腦。

Michael童年生活過得不容易,令他自小已培養出獨立性格,同時也培養出不一樣的生意頭腦。

目標為本 報會考取中五學歷

不斷自稱「讀得書少」的Michael的確只有中學學歷程度,原因正正是家景不佳。

他指,那時一直等、等到15歲,中三的上學期完後就向父道明言不會再讀書,因他受不住屋企無錢!「其實我讀完中三,中五都冇讀過…..小學用兩蚊都返到學,中學唔得,要食飯要搭車,當然那時同學仔已經好多物質嘢,個人會自卑…然後就出嚟做嘢。」

中三學歷可以做什麼?「就係廚房、跟車,無其他嘢做到架喇,當時拎6000零蚊人工…之後阿媽喊住同我講想我讀埋個中五,所以我去私校報讀中四,讀咗一年後,就轉到另一間學費較平的學校報讀中五,返咗三日學報咗會考之後,就無再返學去返工。」家景不好,但他懂事生性,以目標為本報會考,務求獲取中五學歷,出來工作後更開始慢慢在經濟上反過來照顧家庭。

金融海嘯欠債 阿爸中風 阿媽被裁員 公司執笠

報會考後第一份工就做Sales,當時萬多元一個月人工,相比同齡又已出來工作的同學「搵多幾千蚊」,然後「學人買股票,點知一場金融海嘯,輸咗廿幾萬,就每個月分期還,跟住同一時間,我阿爸中風無做嘢、阿媽被裁員、連我做緊果間公司都執埋笠….真係可以黑成咁!」不如意事接二連三的發生,以為TVB的爛劇才有的橋段竟在現實生活中確確實實的出現了。

但沒有被命運擊倒,路還是要繼續走,所以他再找工作。廿多歲就開始真正「擔起頭家」…真正經歷過貧窮、如此人生經歷令到他處事更獨立,更能屈能伸。

眼前的Michael今天雖已貴為「老闆」,公司生意額達到每年2000萬,也不斷開發新事務,但他卻沒有被「勝利」沖昏頭腦,更沒有一絲「老闆」架子。

當日在他的辦公室進行訪問時,過程「門常開」,外面邊吃零食邊工作的員工也一起聽著整個訪問內容。

Michael公司員工以90後為主,他從不要求員工OT,亦不會用規矩規限他們發展。

從不要員工OT 請假不用跟他交代

Michael稱,他向員工說明,在辦公室找他不需叩門,也不接受稱他為「老闆」,可直呼其名。

他如此「貼地親民」,全因他也曾是個打工仔,深知打工仔的心,不想令員工上班感壓力。

他從不要員工OT、員工請假也不用跟他交代,自己填假紙即可。他相信「吸引力法則」:「你對人好,人哋都會對你好!」

「我覺得自己識嘅人就應該要幫,因為我相信『吸引力法則』,只要一個人正面對待人,人哋就會幫返我。所以創立爽WiFi嘅過程,有好多明星幫我宣傳,但我一蚊都無俾過佢哋。」Michael說。

「創立爽WiFi嘅過程,有好多明星幫我宣傳,但我一蚊都無俾過佢哋。」Michael說。

20萬創業 3年後每年生意額達2000萬

Michael指創業初期挫敗感極大,因為「乜都唔識,試過搵唔到貨源」,第一年「屈埋自己好緊要,埋頭苦幹,唔識咁去做」。

他說:「創業初期,大小事都不斷嘗試、也不斷碰釘,要數生意上遇過最難忘的事,一定是要「瞓機場」,當初創業時,客人上網落訂單,只要是客人要求,我都會做!例如我們有幾個交收點,但若客人要求要到地鐵站交收,我都會去。若客人選擇寄順豐時「甩件」,我又會即時衝去拎WiFi蛋俾客人。」

「創業時當同行都只有兩、三個交收點時,爽WiFi以四個交收點作賣點,其實當年全公司包括Michael在內,就只有4人在4個地方與客人作交收,當中包括機場。

Michael當時一人身兼宣傳、接Order、跟單、做客服等工作,工作時間是早上8:00至晚上11:45。」Michael說。

創業初期,Michael的工作時間是早上8:00至晚上11:45,若客人選擇寄順豐時「甩件」,他會即時衝去將WiFi蛋給客人。

打風令航班延誤「瞓機場」收回WiFi蛋

公司運作了大約半年時,剛開始回本到「正數」、看到有少許成續的時候,Michael在機場交收點的拍檔有天突然即日請辭,在當時全公司只有3人的情況下,Michael唯有與其中一拍檔輪流去機場「頂更」,由於當時沒有門市在機場,他們就利用一架七人車停泊在機場的停車場作交收點。

WiFi蛋要充電可以怎樣呢?就是在機場上免費插頭「周圍插!借電!」

由於當時是剛起步的超迷你公司,爽WiFi的WiFi蛋都是「機駁機」的借出,若天氣不穩、打風令航班延誤,員工或Helper是不會到機場工作,Michael在創業頭一年每遇到此情況都要自己頂上「瞓機場」收回WiFi蛋,再即時充電再轉交給準備上機的客人。

堅持、投入、不斷學習

他的堅持、他的投入,令爽WiFi首年生意額達100萬元,以幾個人計的「公司仔」來說,成績算不錯了。

然後,隨著Michael不斷學習,第二年開始有突破性升幅,營業額超過1000萬;第三年更超過2000萬營業額,現時也在增長中。

2018年4月1日,Michael更投放過百萬開設『零食到家』,大搞零食生意。

Michael的生意愈做愈大,成績有目共睹,但他謙虛地說:「自己最初創業好辛苦,3年來用咗好多時間在人脈上學習點樣做生意,有前輩教我『學做生意前,先學做人』,其實而家就不斷學做人。」

Michael更投放過百萬開設『零食到家』,大搞零食生意,同時也讓公司員工工作時免費任食零食。

珍惜每一個客人

「每一個客我都好珍惜,由於網上生意沒大機會可以直接接觸客人,我就學返以前做電訊業做門市嘅經驗,我都Sales出身,好想了解每一個客。而家成日都講大數據,我相信大數據,但我想再親密啲,所以當時我每一個客人都親自致電了解,那時客人對此反應極佳,認為服務非常貼心。當全行都只傳一個確認訂機電郵給客戶,我們直至今時今日都使用Whatsapp給客人,現時單是傳送Whatspp工序,都有兩個全職同事主力做傳送及接收的工作。」他說。

他希望做到品牌朋友化、不想機械化,所以由以前一個月幾百張訂單,至今時今日一個月過萬張訂單,爽WiFi都以同一方法Whatspp確認訊息予客人,因為若客人到了外地,萬一有何問題,都可利用Whatsapp聯絡他們。

Wi-Fi蛋生意賺到好多聲譽、尊重、朋友

「Wi-Fi蛋生意未必賺到好多錢,但令我賺到好多聲譽、尊重、朋友,我知道呢個行業未必可以持續很久,Michael深明科技可以淘汰一個行業,做Wi-Fi蛋生意未必可以持之永恆,但他相信旅遊業可以持之永恆。」Michael稱。

所以現時爽WiFi努力轉型中,想做成一站式旅遊品牌,現時例如會做一些旅遊保險的優惠、機場接送、租翻譯神器、日後會推出租車、租喼、租相機、One Day Tour,不同的旅遊產品都會陸續加入及推出。

體驗1分鐘貸款批核 隨時提款話咁易

平遊東京不是夢!最平住宿喺晒呢到

去大阪想搵住宿?識睇一定睇呢到!

去首爾掃貨住邊好?入嚟幫你格價搵至抵住酒店!

短trip遊台北叉叉電,即訂平、靚、正住宿出發!

去旅遊想搵住宿?識睇一定睇呢到!

90後唔做律師創業印卡片 10萬本3個月回本 每月生意額近百萬


延伸閱讀:

80後女生創立插畫品牌 每月淨賺坐底50,000元 | 80後創業 | 創業個案 | Startup