《木棘証人》羅子溢演技大爆發 完美演繹被帽之痛
無綫劇集《木棘証人》正在熱播中,早前就講到一腳搭兩船嘅Yuki(張秀文飾)與Jason(林景程飾)去飛鵝山幽會,Chris(張曦文飾)同阿哥李浩帆(韋家雄飾)就尾隨兼影下二人「車震」嘅證據。雖然Chris有用婉轉方式告知高力基(羅子溢飾),不過可惜佢就get唔到,仲去同Yuki求婚。去到噚晚嗰集紙終於包唔住火,Chris邀請力基到家中作客,諗住話比佢知Yuki有第三者,不過力基就帶埋家姐高詠音(張文慈飾)同Yuki去屋企食飯,期間詠音就提議影相留念,睇相時無意中發現Yuki偷食嘅相片。之後,力基與Yuki對質,點知俾Yuki鬧返轉頭,仲將責任歸咎於佢。喺呢個時候力基冇講太多嘢,只係默默的流下男兒淚,完美演繹被帽之痛。
現年36歲嘅羅子溢(前名:羅仲謙),喺2016年拍完劇集《潮流教主》後就離開無綫,積極北上賺人仔。過往羅子溢一向俾人嘅感覺都唔係演技實力派,不過今次佢就演技大爆發,令觀眾對佢另眼相看。睇完呢一場戲後,唔少網民都留言大讚佢演技有進步,例如:「進步左好多,希望可以返嚟拍多D劇,好過睇嚟睇去果幾個」、「謙謙知悉戴帽果刻演技竟然幾唔錯」、「浸耐咗真係唔同啲,做得幾好」、「羅仲謙 呢場d戲幾好」及「謙仔做戲幾好」等等。