活士大翻身 對Nike只算虛火

高球名將「老虎佬」活士事隔11年再奪大滿貫錦標，刺激多年來對活士不離不棄的Nike股價急彈，有分析指活士可以為Nike貢獻2254萬美元品牌價值。不過相對Nike本業面對的挑戰，活士翻身消息只算係短期虛火刺激。

Nike去年交出亮麗業績，但Nike第三季財報顯示，賴以食糊的北美及中國市場增長速度皆遜色於上一財季，Nike更預告去年第四季及今年首季營收增長將放緩，令Nike股價近期持續疲弱。

Nike營收增長放緩，管理層解畫是受匯兌衝擊。不過更深層次的原因，可能係與蘋果遇上同一困境 :產品款式未見新意，售價又太貴。線索係2018年美國最受歡迎波鞋係Nike平價款式Nike Tanjun，再比對去年IG最受歡迎波鞋，頭兩名及第四名由強敵Adidas獨佔，第三名落在Vans手上，Nike波鞋叻極都只係佔據第七名。曲線反映最吸金的貴價波鞋陣線，Nike似乎處於落後形勢。另一線索係Nike公布在下一個財年力推更多價格100美元以下波鞋以搶攻平價市場。令人想起手機界Samsung近期把新技術先注入中價機力谷銷量彌補貴價機滯銷缺口的策略。

假如Nike仍未能拋出殺手級波鞋系列，例如擴大自動綁帶系列，要重拾強勢增長就有一定難度。當然活士翻身兼keep住好成績，對Nike高球產品系列始終有利，但就未至於成為推動股價繼續升的引擎了。

===============

精選資訊網站「中環街市」 臉書粉絲頁

【相關搜尋】老虎活士性醜聞