雅虎香港財經 渾水專欄｜食飯行會籍制仲吃香嗎？（渾水）
早幾個星期，我收到一位知名靚女藝人朋友send 來的一個pitch，原來有間米芝連餐廳租用咗中環一個幾出名嘅地方做會所。上面寫咗只係比圍內朋友的會所價目，佢收到之後就send畀我，問我有無興趣join。聞說，某潮人喺中環開了幾層嘅餐廳，都想把它打包成會所。
美股外幣即時報價 多國新聞任睇
我平日好少講會所呢類話題。有人會覺得會所係一啲身份地位嘅象徵：馬會、高爾夫球會、香港會等等⋯⋯本身會所有入場門檻，聽落就好似擁有好勁嘅社會地位。呢啲嘢對我個人嚟講冇乜太大吸引力，我奉行斷捨離原則，對名銜冇好大執着和興趣。何況我普通出身，就算我有香港會會籍，也沒有丁點社會賢達的氣質，着起龍袍不似太子。
面子遊戲+方便訂枱
不過，高級餐廳邁向會所制，是一種有趣的經濟現象，當社會科學話題去分析也無不可。行會所制，第一就係捉心理——做到會員好有面子；第二，如果係難訂枱嘅餐廳，有會籍去令訂位較為方便，可算係賣點之一。
作為生意營運者嚟講，有一班人買咗會籍就可以先鎖定左一部分現金流。
早幾年有錢仔富二代喜歡搞會所，行會籍制，也是圈一班自己圍內朋友互相消費。有錢仔身邊有好多擦鞋仔，為咗埋佢哋身，這些擦鞋仔多少都要付出一下。常人以為擦鞋仔專搵富二代着數，但富二代都唔係個個傻仔，你要參與人哋嘅圈子，首先要付出。
我以前在富豪飯堂都有一個特殊會籍，只係這個會籍並沒有太公開同明文簽訂，純粹就是我同飯堂之間的默契。內容大致是我去食飯有九折，同埋可以賒數一個月後先找數。我只係熟客，冇畀任何會費，咁當然我自己都識做，逢親過時過節，唔理佢新年、端午節，中秋月餅，乜券都買一堆走，作為一個交換條件。那陣時要跑山，有這些富豪飯堂落腳傾生意方便好多，現在我深閨，用不着了。
當前我擁有嘅會籍有兩個，將來想加入多兩個會籍。這些會籍都不是一般外界會標籤你為社會賢達的會籍，但我認為都是有趣的會所。我想加入嘅原因係想窺探一下呢啲會所入邊的Community bonding是怎樣。
我暫時比較常用和喜歡的是SOHO House全球會籍。西方國家知名大城市都有SOHO House，community bonding很強，會員相對年青，vibe都比較young ，藝術氣息又濃厚。開返關之後，我呢兩年周圍走，去到唔同地方諗住飲杯咖啡，搵個地方做嘢落腳都會去當地嘅SOHO House。
有時候揀會籍都唔一定只係着眼身份地位象徵，同自己相性夾唔夾都好緊要。但我都明白越來越多餐廳，因為營運需要去推行會籍制，而呢個趨勢可能會越來越流行。現在，不單止富二代、營運餐廳的人喜歡行會籍制，也有不少內地有錢人，都開放自己的私人會所，轉行會籍制了。
渾水
本欄逢周日刊出
