【熱話】如果你有個濕疹同事⋯⋯
香港地空氣差,唔少人天生或者後天會就有濕疹煩惱,辦公室或者朋友圈入面,更加會有一啲患嚴重濕疹嘅人。最近有關注皮膚過敏嘅機構就出咗個廣告,呼籲大家顧及濕疹人士嘅需求:
傾計時望住對方雙眼;
唔會亂咁建議療法;
用心聆聽患者需要;
唔會刻意避免身體接觸。
之但係有唔少人覺得呢4個呼籲有啲唔妥,覺得似係自我標籤。
一來好多人傾計都唔會望住對方雙眼,可能因為怕醜,唔關你有冇濕疹事。二來男女授受不親,身體接觸好難判斷係咪刻意。至於療法,其實一般傷風感冒,同事朋友都會交流好多偏方,都係信不信由你。根本唔需要標籤濕疹患者。
好多濕疹患者確實喺職場上都遇過好多難受目光: 例如,著深色衫會有好多皮屑,有時會惹來同事朋友嘅嫌棄目光。又好似身邊啲人好似同自己保持兩秒距離咁。試過有同事係完全唔敢掂對方用過嘅紙同筆……
希望各位打工仔都可以設身處地咁想想身邊同事朋友嘅感受,令辦公室少一份難受,多一份愛!
來源:facebook
===================
19網輕鬆爆料熱線,歡迎舉報老細同事19惡行,立即click入去講畀我哋知啦