【熱話】香港打工仔大撕裂

尋日朋友成班同事比起平時早咗成個鐘返工，見到面果陣，除咗交換交通情報，都不得不慨嘆一句「我哋奴性真係重」。有啲被塞車影響嘅，明明已經收到恩准，話可以home office，但最後都排除萬難，用咗成三個鐘，成功返到公司，同事見到都不禁問：「做咩唔返屋企做？有冇咁想返工呀？」

有打工仔就網上大呻，講到自己並唔係奴性強，只係一家大細等佢開飯。一諗起有一家大細要養，同時又供緊樓，而公司老細又講到明今次罷工會記名，你仲敢唔敢拎一家大細去搏？除非你諗住辭職劈砲，手停口停。

亦有人反駁自己唔係奴性重，只係唔值得為呢班年輕人罷工，佢哋覺得自己有自主權，唔應該連返工都要被威脅。

當然有一班草根階層，仍然為緊一兩千蚊、行轉街都跌咗嘅勤工獎掙扎。呢啲都未必係一般中上階層嘅打工仔能夠明白。

香港打工仔已出現大撕裂，支持返工同唔返工，各執一詞。

不過網民舉出最極端例子，就真係有點誇張，話說有老闆見到尋日各區情況開始惡劣，所以提早叫員工收工。點知有同事竟然發晒老脾咁：「咁多嘢未做點收工呀？」老細叫到，佢都唔肯收工。

可能潛台詞係「咁多嘢做，唔夠人做，你仲放人走」？唔係唔想走，而係真係啲嘢做唔晒呀……

來源：香討

===================

19網輕鬆爆料熱線，歡迎舉報老細同事19惡行，立即click入去講畀我哋知啦