雅虎香港財經 爆一爆｜地產商陸續跪低 磚頭大縮水（Louise）
呢排業績期，見到地產商都輪住跪低，係物業重估方面都不得不面對現實「洗白白」，望一洗頹氣無謂自欺欺人。好簡單啫，宜家話新界樓賣兩萬蚊一呎，都冇人信喇。
美股外幣即時報價 多國新聞任睇
「中環大地主」物業身價一縮再縮
「 中環大地主」 置地(H78.SI)，雖然早就遷册去新加坡，但嗰堆磚頭如交易廣場、Landmark 一幢幢寫字樓都係香港地產嘅風向儀，香港好多收租佬都揸住置地嘅股票，正所謂知己知彼。
置地公佈中期業績，睇佢物業重估條數，表面都幾嚇人，物業重估累置地虧損 $8.26億美元（折合近$65億港元）。主要就喺重估中環嗰堆商場及寫字樓，其實去年置地都有重估過一次，虧損都有$7.42億美元（折合$58億港元），重估過呢啲磚頭個NAV(資產淨值）就貼市啲。其實股價亦反映磚頭大縮水，置地股價2022年初有近$5.7美元，現價$3.32美元，兩年多足足蒸發咗四成市值有多。
率先張揚會因為物業重估而導致業績見紅嘅九倉置業 （1997.HK），物業重估減值$44億，累公司盈轉虧蝕$10億，主席吳天海更揚言零售唔掂的話，下半年會繼續減值劈！似乎地產商都唔怕「You Jump， I Jump」。
大劉旗下的華置（0127.HK）亦因為物業重估導至業績見紅要發盈警。而不時語出驁人恒隆（0101.HK）榮譽主席陳啟宗更一語中矢，謂「Everybody is in hell」，個仔陳文博亦直言睇唔通前景係點，相信地產行家甚有共鳴。物業重估後為恒隆帶來$6.74億元嘅虧損，可以預示嚟緊陸續有業績公佈嘅地產商，都排住隊上磅秤過磚頭嘅價值。
無上市地產商更大鑊
其實物業重估令資產負債表縮水，唔影響現金流，上市公司又有多方面融資渠道，甚至有母公司照住隨時揼水頂得住。
有啲無上市的私人地產商先最大鑊，聽啲銀行佬講，現時市場上有一、兩家無上市嘅地產商頻臨爆煲邊緣，銀行都掙扎緊是否要call loan，好話唔好聽，一call就死快啲，無獨有偶，呢啲在懸崖邊嘅地產老細，都係孻仔，同時係二奶仔 !
