爆一爆|富豪寃家 只有永遠永遠嘅利益(Louise)
商界有句名言:「沒有永遠的敵人,只有永遠永遠嘅利益!」昔日誠哥李嘉誠跟九倉前主席吳光正,是商場上嘅寃家,所以過去幾廿年兩位富豪旗下長和系和九倉系甚少有合作項目。
美股外幣即時報價 多國新聞任睇
貨櫃碼頭空地曬太陽
但世事無絶對,近排聽碼頭佬講,九倉旗下嘅現代貨櫃碼頭(MTL)將會同誠哥旗下的香港國際貨櫃碼頭(HIT) 有合作,MLT會同用HIT的一套軟件系統,名為「N-GEN」,旗下的資深員工見過兩大巨頭在商場大鬥法,如今竟然携手合作叫人嘖嘖稱奇。其實香港貨櫃碼頭業自通關後,生意大不如前,此兩大貨櫃碼頭大佬非要度橋求生不可。
早兩個月與友人行山,遠眺葵涌一帶貨櫃碼頭,見到一大片貨櫃碼頭空地曬太陽,心都一寒,碼頭老友告知:「疫情期間封城,本來經香港嘅貨櫃去大陸,就索性直接去咗鹽田、赤口、南沙;呢幾年大陸喺報關上又開放咗又有彈性咗,啲櫃直接由大陸廠去碼頭,唔使經香港。」
個餅細咗,自然要減省成本,早已洞悉貨櫃碼頭乃是夕陽行業,五年前幾大貨櫃碼頭公司就成立「海港聯盟」包括MTL和HIT,目標都係共享資源慳得幾多得幾多。聽講MTL一路以來用一套名為NAVIS軟件,成本同處理貨櫃數量掛鈎,到今年底就會同HIT共享一套名為N Gen的軟件,所以有利益就行得埋,生意愈艱難,商界愈團結!
碼頭雙雄變陣搞凍倉
恒隆榮譽主席陳啟宗話齋:「Everybody is in hell。」仲唔止,聽講兩大碼頭大佬還度緊轉營大計,打算將部份貨櫃碼頭地皮改建為凍倉,因為香港凍倉需求強大,租金有價有市,做收租佬好過做碼頭佬。
昔日香港經濟生氣勃勃,商家佬都特別進取,吳光正同誠哥經常過招,話說吳光正九十年代投得有線電視牌照,李澤楷隨即又搞衛星電視,但有線電視要入屋駁線,而衛星電視只需在天台裝碟,咁就激死吳光正,雙方於是大鬥法,長實旗下大型屋苑禁有線入屋,同樣九倉亦反制,禁安裝衛星天線的公司進入旗下管理的屋苑安裝碟型天線,手法都幾小學雞㗎。鬼咩!當年冇競爭事務委員會嘛!一切俱往已。