【環球趣聞】傻傻分不清 外交人員歡迎比利時國王 插錯德國旗
好多人唔多留意世界各國嘅國旗,畢竟唔係經常接觸,最多人識都係經常會去嘅例如日本、韓國、歐洲大國、東南亞國家等,一啲比較少人去旅行嘅國家,未必會知人哋嘅國旗。但係我等升斗市民就話可以唔識啫,身為一國嘅外交人員,就無理由搞錯掛!
話說日前加拿大就生發一單外交笑話,比利時國王前往加拿大作外交拜會,咁為咗歡迎佢哋,加拿大外交人員,就喺一棵樹上插上加拿大國旗,另一邊插上「比利時」國旗,但點知睇清啲,啋!原來係插錯咗德國國旗!比利時國旗係打直3間黑、黃、紅組成,德國就係打橫3間黑、紅、黃;估計係外交人員一時睇錯,誤把德國旗當成比利時旗。好彩發現之時比利時國王未到,於是急急腳更換,未致於發生尷尬場面。
不過呢棵樹都唔簡單,極具意義,係已故比利時王后Fabiola於1977年首次拜訪加拿大時親手種落嘅樹苖。今次到訪嘅國王同王后,亦會喺呢棵樹側邊再種另一棵苖,別具意義呢。
搞出個大頭佛就係插錯呢支德國國旗,好彩未畀比利時國王見到。
真正嘅比利時國旗係呢個樣嘅,唔好搞錯。
呢棵樹由已故王后Fabiola於1977年所種下。
.
相關文章:
【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!