的士支付大戰正式展開（石先生）
去年年底，支付寶 HK 開始用其 QR Code 服務進攻的士。服務開展至今有多成功相信大家搭的士都可感受得到，的士司機與乘客還是用「現金」付款，相對支付寶 HK 最近搭配麥當勞的優惠來睇，進攻的士可以講係「失敗」收場。
雖然係咁，但唔代表幾近全自僱嘅的士業被放棄。繼 HK TAXI 夥拍 MasterCard 鼓勵大家 Call 車俾信用卡送 HK$25 優惠劵後，收購「快的」後改頭換面登場的「滴滴」也都開始燒錢推廣之旅。
支付寶搭的士唔掂
乘客搭車即日起 Call 車用信用卡俾錢即享 六折，上限最高 $50，司機每單額外得 $50 (朝早 8-9 $100)，做夠 15 單再額外得 $1,000，名乎其實用錢來買司機、買乘客，希望大家搭的士唔再俾現金，改俾信用卡，為未來一統天下舖路。
支付寶 HK、HKTAXI，滴滴來勢洶洶，一直大落後嘅八達通當然唔執輸，配合傳聞登錄香港嘅 WETAXI HK 招司機開「商用版八達通」，俾司機可以用手機一拍收錢。傳聞成功開戶司機送 $100 現金，累計收款達 $1,000 再送多 $200，未開波先招司機搶地盤。
電子支付市場搶客活動今次由食肆轉到的士，當然唔止想吸引大家用咁簡單。三間 Call 的公司邊間做到手機 Call 的龍頭，未來話語權更大，司機中短期似乎都可以繼續享盡競爭帶來嘅搶客優惠，但 Call 的最後會否同 Call Van 一樣，唔用 GGV 就無單就唯有拭目以待啦！
作者：石先生（科技博客Stone IP）
===============
財經精選資訊網站「中環街市」 臉書粉絲頁