笑到最後｜加息先去美元化 不如投訴加定存息（高明）

最先開始有去美元化嘅講法，可以追溯到金本位瓦解。 (Yevgen Romanenko via Getty Images)

美國聯儲局加息到接近周期高位嘅5厘水平，突然一輪宣傳話「去美元化」，高明第一個反應係嫌錢腥、嫌息腥呀？因為主要有關去美元化嘅評論都係來自華文媒體，英文傳媒唔係冇de-dollarisation或者Dump US Dollar嘅講法，但係大家都知講咗好多年，所以今次冇被炒起。

下載Yahoo財經APP

美股外幣即時報價 多國新聞任睇

最先開始有去美元化嘅講法，可以追溯到金本位瓦解；近少少嘅10年前，一度都講過歐元取代美元成為石油結算貨幣。最終咪又係用返美元，所以有記憶嘅傳媒冇太上心。對紙幣狂魔最厭惡嘅年代，應該係兩年前，不過當時唔係講緊去美元，嗰陣係講緊在座咁多位法幣都係垃圾，另立加密貨幣取代法定貨幣，有提出去法幣化，亦有crypto解決方法，理論上好完整。

貨幣因政治需要被溝淡

呢個情緒最高漲一刻就係當時比特幣見頂嘅時候，兩年前嘅放棄法定貨幣潮，其實非常合理，可惜加密貨幣上落大，現時更加似資產多於貨幣。

貨幣作為儲存財富嘅工具，多年來因為種種政治需要被大幅溝淡，美元為首嘅法幣陰司紙化，低息先係講去美元化嘅最佳時機。高明最大惑不解嘅就係美元息口多年低迷，去美元化嘅聲音都只係由下而上，去到今日加息嘅時候，反而有由上而下去美元化聲音，實在唔合理。

情況有如小股東維權，正常應該喺股票價值被溝淡嘅時候——例如大股東供股配股——先至維權，邊有小股東喺管理層回購派息嘅時候維權？使唔使去銀行投訴加定存息口？用呢個邏輯推斷，最大機會投訴就係加息嘅受害人，借貸利率上升成本增加，需要改變單位畀少啲息，此乃後話。

可能會有人話，貨幣仲有交易單位呢個用途，只係改用其他貨幣結算，儲存價值功能不變。

呢個係身體很誠實嘅講法，真正去美元化，取決於負責處理改變貨幣結算官員嘅私人銀包，運用公家錢去美元化，床下底喼銀紙有冇行動一致？

正如畢菲特最近講，冇人會願意用一萬美元換取永遠唔用iPhone。利誘你嘅貨幣係美元，買iPhone最後又係用美元，講去美元嘅人掉晒啲iPhone 同Android機，都生活如常，之後先至有去美元化基礎。

忽然覺得兩年前crypto幣界嘅人正氣好多，真係換晒啲法幣做crypto，可惜交易一刻都係美元計價，穩定幣又係鈎美元。自己荷包咁大決心嘅人都擺脫唔到美元，用人哋錢嘅人會搞成點，就有如正如投資界所講，基金經理管自己錢，同管人哋錢嘅時候差好遠。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出