雅虎香港財經 笑到最後｜回禮角度睇杜拜王子5億基金（高明）
杜拜王子阿里（Sheikh Ali Rashed Ali Saeed Al Maktoum）事件持續發酵，馬雲旗下南華早報先後指出王子辦公室地點並非商業區，以及王子原來係「歌手」，血緣以外一樣係舞台王子。所謂「星期日邊度最多菲律賓人」，王子選擇嚟香港發展其實好乎合佢演藝事業發展，此乃後話。
美股外幣即時報價 多國新聞任睇
王子IG有千六萬粉絲
網上評論，指出今次事件係一個「雞棚」。今次由南華早報帶頭起底，確實帶出唔少疑問，特別係好多有關人物，都只係得一個名，冇學歷、冇往績、冇背景。
香港方面就一面倒報王子嚟香港嘅事，翻查杜拜英文傳媒Gulf News，都有過兩篇報導，一篇舊年12月，一篇今年2月，大概話阿里嚟香港簽咗咩MOU，同商會見面之類嘅公關稿悶嘢。報道冇講過阿里係王子。
同一份Gulf News另一篇4月3日講黃金簽證嘅文章，另一位Sheikh Hamdan bin Mohammed bin Rashid Al Maktoum會寫明係杜拜王儲（Crown Prince），呢位王子係兼杜拜執行委員會主席（立法機關），有實權，係王子儲君。值得一題，佢IG有千六萬追蹤人數。
中東好客文化
換一個角度去睇，中國香港特區政府2023年2月到訪中東，會見杜拜基金Investcorp同杜拜控股集團，Investcorp管理資產達500億美元，杜拜控股總資產值達1,300億阿聯迪拉姆（約354億美元）。
舊年12月路透社一篇新聞，講杜拜將幾間國有企業，包括水電公司、路費公司同的士公司，放入一間投資公司入面，基金用作投資國內外股票，而基金負責人，就係上面講嘅王儲Hamdan Maktoum。
以往畢菲特訪問完中國，港交所（0388.HK）就會露牌話巴郡（BRK.A）買咗中石油（0857.HK）；再訪，又買比亞迪（1211.HK），呢啲就叫刁。嗰個規模嘅資金，買手信就得股市可揀。
舊年特區政府訪問杜拜，政府新聞稱同阿聯酋簽咗七份合作備忘錄或意向書。12月財政司陳茂波網誌講沙地ETF上市。按照特區政府慣例，如果同阿聯酋有刁，應該24小時廣播，提都冇提即係冇事發生。
中東文化，其實係好客文化。根據ChatGPT，阿聯酋有着豐富的文化傳統和社交禮儀，在阿聯酋文化中，交換禮物係一種常見的習俗，用於表達尊重和友誼。在拜訪某人家中或在特殊場合時帶上禮物被視為禮貌和尊重的表現。選擇禮物時要考慮禮物的意義和適合性，以體現對接收者的尊重和考慮。
訪問一年，香港政府去完杜拜一年都仲係兩梳蕉，但人哋好客之邦，阿里王子5億美元家族基金作回禮，成個家族都幾有禮貌。嗰位王子嘅級數，就反映咗杜拜對香港回禮嘅意義和適合性。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
