笑到最後｜國際吹俄羅斯戰敗風 對美股的啟示（高明）

國際最新風向，係俄羅斯已經打敗仗。

國際最新風向，係俄羅斯已經打敗仗。法國總統馬克龍接受法國傳媒「每日輿論報」訪問指，俄羅斯已經在地緣政治上輸了戰爭。俄羅斯閱兵規模大幅縮水，亦引起好多戰事失利猜測。事實上最初閃電戰拖到今日超過一年。一個人本來打算快閃去5日旅行，點知滯留當地長達一年以上，淨係食宿都好㩒計，更何況打仗。

下載Yahoo財經APP

美股外幣即時報價 多國新聞任睇

返入正睇講股票。過去一年美股主要受通脹引發嘅加息打擊。通脹主要當然嚟自疫情大規模印鈔，突然打仗影響能源供應亦都推高能源產生嘅各項物價。寫稿呢刻紐約期油71美元一桶，今年油價下跌11.66%，過去一年計下跌37.55%，大致回落到2021年打仗前嘅水平。

過去石油輸出國打仗嘅往績嚟計，軌跡接近，打仗初期油價飆升，後尾拖長或打敗仗後，油價回落甚至去到低位。

通脹受控 有權減息

例如兩伊戰爭，1980年油價創當時歷史新高147美元，處景同今浪更似，又係高油價同高利率，當年利率更高見20厘。MacroTrends顯示86年油價低見29美元一桶，高位大跌八成。1990至1991年嘅波斯灣戰爭又係，90年短暫衝上90美元，由於全球經濟穩健增長及石油供應穩定，石油價格喺40美元至30美元每桶範圍下降。

不過，2003年美軍攻打伊拉克，之後油價都冇跌，因為同期有中國大國崛起，對資源需求大增。

兩件引發通脹嘅事，包括量寬低利率及油價，兩者都打回頭，雖然大部份時間油價同股價未必有直接關係，但係低油價對所有成本影響深遠，亦都影響息口預期。

俄羅斯正式打敗後，不論政治後果如何，佢嘅能源肯定談判條件，或者可以見到今浪一個低能源價格嘅年代。控制通脹目標後亦有條件減息，只要冇下一場戰爭發生，牛市就由呢刻開始。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出