笑到最後｜從債務上限危機的AI逃生口（高明）

法興一份報告指，標普500指數非AI股份，今年下跌1%，即係升幅都係嚟自AI。

美國債務上限出現危機。每次有同類危機，第一時間要檢閱嘅，就係今次係真危機，定係搵嘢嚟講。

下載Yahoo財經APP

美股外幣即時報價 多國新聞任睇

一般嚟講，真正危機都係玩大咗，借錢太多，無法收科。金融海嘯係一例。對上疫情冇咁常見但加息周期完結再始減息，就算冇肺炎本來都會有嘅事發生，疫情只係令個市立即跌足。

今次加息周期去到尾聲，一般估計最多可能額外加一兩次，同2019年其實有啲似，不過一單還一單，今次呢單淨係講債務上限危機。

先講結果，美國聯邦政府從未因未能達成債務上限協議而發生過全面的債務違約。過去30年，主要有5次類似情況，分別95年至96年、2011年、2013年、2017年及2019年至2021年，客觀結果只係令部份政府部門停止運作，冇真正違約。

有一次特殊情況發生喺1979年，當時由於技術故障及行政錯誤，導致美國政府未能及時償付部分國債利息，造成了短暫技術性違約。事後大家都知道，最後咪又係用返美金。

債務違約搵嘢嚟講

好明顯，今次債務違約係搵嘢嚟講，財長耶倫定6月1日出嚟，都只係政治上逼對家快手搞，而所謂對家其實都有默契，擾攘完一輪最終一定達成共識。如果真係減息減得較急，咁先會似另一個危機，債務上限唔係，只係一個大合唱。

喺穩中求盈利情況下，美股主要科技股都升緊，法興一份報告指，標普500指數非AI股份，今年下跌1%，即係升幅都係嚟自AI。其中，佔指數8%嘅蘋果（AAPL）今年升34%，但法興並冇將佢視為AI股，因為佢未好似Google（GOOGL）咁公佈Bard之類嘅AI實質嘢。即係話如果將蘋果計埋入升幅大家庭，標普非AI會跌更多。

類似美股環境隔一排就出現，對上2021年就係例子，2020年高增長股升浪帶唔到去2021年，全年只係大型科技股輸流升，指數係牛市，契媽股係熊市。咁又唔係太差嘅市況，亦都應驗咗本欄嘅宗旨，就係霸權股喺生活全方位屈機，股市只係個逃生口，打唔贏佢，唯有參與。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出