廣告

笑到最後|從財閥家的小兒子到現代投資(高明)

從財閥家的小兒子到現代投資
真正財富差距離至熊市,個個冚晒牌唔跟,你手上有大把籌碼,仍然可以喺市場上立足。 (Richard Drury via Getty Images)

最近煲一套韓劇「財閥家的小兒子」,高明覺得內容科幻,更好嘅譯名應該係有少少多啦A夢味道嘅「小財閥大冒險」。盡量含糊,但都有少少劇透,喜唔喜歡繼續睇落去就自行斟酌。

下載Yahoo財經APP

美股外幣即時報價 多國新聞任睇

故事設訂大部份時間都用未來人嘅角度嚟投資,好多個大浪都食得應,但更加重要係,避得過兩次嘅金融危機,呢個應該係「小財閥大冒險」一個好重要嘅啟示。

由於主角係未來人,好多大浪都食到,包括亞馬遜(AMZN)IPO,故事入面講佢賺好多錢,但係同期南韓都出現經濟泡沫,雖然冇明言,但肯定主角嘅競爭對手冇大茶飯食都有小茶飯,你中三T佢都有三重彩,財富增長差距唔係咁大。

避開股災能力更有用

真正優勢係97年亞洲金融風暴,正常都會孖爆博到盡,未來人知道97大限換晒美金,結果係亞洲貨幣持有者輸死,揸美金等個價落慢慢Shopping。

第二次係911,未來人再一次知道危機,先轉晒現金,再喺911後狂掃股票,一來一回,小財閥終於變大財閥,坐視其他財閥清零。

返轉頭又係一個老掉牙嘅結論,就係防守緊要過進攻。打籃球有一說,進攻贏得比賽,防守贏得冠軍。應用喺投資可能更加貼切,大牛市贏錢唔難大家都知道,萬一大牛市贏大錢,其實都唔係大錢,因為財富同資源係相對,你贏大錢,人哋贏中錢,資源有限,大牛市去食米芝蓮你都係要等位,病咗去睇醫生,有預約醫生都要你喺診所呆等一粒鐘。

真正財富差距離至熊市,個個冚晒牌唔跟,你手上有大把籌碼,仍然可以喺市場上立足,兼夾米芝蓮侍應嗰個時候先當你係客,相對牛市時只係面口模糊嘅人。

兩種能力:超凡嘅揀股能力,以及避開股災嘅慧眼,如果只可以二選其一,後者其實更加有用,因為大牛市唔使識揀股,冇選股能力一樣可以透過加大槓桿買指數嚟提高收益,到熊市再見真章。

至於標題刻意講現代投資,現代同古代嘅唔同,係97年金融風暴可能十幾廿年一遇,但現代市場,兩三年冇大風浪一樣可以有同等跌幅,股災可能成日發生,2022年都係一次股災,更加係高增長股嘅金融風暴,所以防守變得比過往更加重要。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周三刊出