笑到最後｜成個港股成交＝一隻Big Tech嘅啟示（高明）

啱啱過去嘅星期四，港股成交金額只得470億港元，創多年新低。 (Jackyenjoyphotography via Getty Images)

上星期本欄發表「港股會反彈嗎？」一文，然後啱啱過去嘅星期四，港股成交金額只得470億港元，撇除輪證成交，成交額為387.93億港元。香港上市公司商會主席梁嘉彰指，「關注的是歐美資金已不太來港，問題非常嚴重」。

下載Yahoo財經APP

美股外幣即時報價 多國新聞任睇

港股全日成交僅60億美元

如果用國際資金角度，任何金額都要計返美元，香港全日成交金額為60億美元，數字顯示，以90日平均成交額計，僅僅落後於阿馬遜（AMZN）嘅69.5億美元、Meta（META）69億美元、AMD（AMD）嘅62.4億美元。多過納指正向三倍ETF TQQQ嘅34.8億美元，其實都值得開香檳（納指一倍ETF（QQQ）平均成交額為183.3億美元）。

一市獨大 大勢所趨

全世界股市整合成美股主導、一市獨大已經係大勢所趨，比較好彩嘅市場，例如台股，會有台積電（TSM）及聯電（UMC）代表成個台股，荷蘭都有ASML（ASML），中國都有阿里巴巴（BABA）等。

以體育做比喻，股票市場嘅發展並冇好似足球咁，唔同國家都發展出一個市場，滿足到國內外需求，股票世界更加似籃球，美國以外嘅世界嘅籃球水平的確高咗好多，但係最勁嘅人都會去美國打波。同樣道理，世界亦冒起唔少優質公司，但係真正表演嘅舞台就係美股市場，最近一例就係日資嘅英國公司Arm（ARM）都係去納指。早前亦有報道指，英國都有移民潮，英資倫敦上市公司亦研究轉場去美國上市。

所以成個港股嘅成交額，等於美股嘅一隻Big Tech，其實好正常。

比較好彩嘅市場，例如台股，會有台積電（TSM）及聯電（UMC）代表成個台股，荷蘭都有ASML（ASML），中國都有阿里巴巴（BABA）等。 (EMMANUEL DUNAND via Getty Images)

又再以體育做例子，近期日本足球隊先後友賽打贏德國及土耳其，英語世界Youtuber開始講述三十年前嘅一百年世界盃冠軍大計，再加上啱啱過去嘅世界盃決賽周先後打贏冠軍隊德國西班牙，但實際上，最勁嘅球員，都係外流踢波。假設外國球迷係外資，就算外國球迷就算幾迷Mitoma 三笘薰，睇波都係睇英超，會山長水遠去睇J League都只係少數。外資好鍾意台灣，咪去買TSM囉，唔使去台股市場嘅。當然，畢菲特入股日股係例外。

港交所（0388.HK）又好，上市商會又好，都應該開始接受最一流嘅企業，都要揀美國上市呢個現實，錢得咁多，個個去買美股，其他市場成交轉移都好正常。如果膊頭有花嘅機構同個人仲想發揮餘溫，仍然覺得香港真係一塊福地，貢獻吓香港，應該培育下一代企業，長遠以美國上市為目標。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周六刊出