笑到最後｜政府有咩方法可以谷起樓市？（高明）

利率導致港樓冇投資價值，但係任何嘢，包括一張郵票一個口罩，都可能會有投機價值。 (pa_YON via Getty Images)

聯儲局再加多一次息，個別證券行嘅簡單剩餘美元存款，都可達4.83厘（實際會低過，因為有條件，大約4.3厘至4.5厘左右吧），最近港元做定期都有4厘。相對香港租金回報率約2.8厘，如果唔係自住，可以話買樓已經失去投資價值。

下載Yahoo財經APP

美股外幣即時報價 多國新聞任睇

至於投機性嘅賺升幅，2020至2021年疫情後大反彈，連投機第三世界英國加拿大嘅樓市都大反彈，更加唔好提咩新加坡嘅傷心話題，唯獨是香港冇反彈，事實上係個市同世界脫鈎。

雖然都會有一啲人話：唔係呀，我住嗰度仲係好貴，你買唔起樓就喺度睇淡。但係新聞主要係業主減價，呎價不斷跌穿若干年嘅價，同本人唱好樓市時，業主只有反價冇減價另一回事。

當然，想當年已經冇意思，如果一個政府面對現時樓市，可以點「谷起」？

事實上，「谷起」嘅心態已經錯，係嗰種到喉唔到肺嘅經紀思維。可能一時之間刺激到成交，又話者樓價會企穩，但一係唔持久，一係有價冇市，最後都係價跌先有市。真正嘅重啟牛市，必定係價量齊升同埋大家爭住買。

降低持貨成本

正如第一段所講，利率導致港樓冇投資價值，但係任何嘢，包括一張郵票一個口罩，都可能會有投機價值。投機價值嘅根本，嚟自值博，值博有兩個體現，一係未來前景好要不問價買，另一個就係太平太賤唔買對唔住自己。

頭一個條件前景好要不問價買，喺新加坡發生緊，Taylor Swift都忍唔住加多三場，其他一般有錢人又點頂呢？

至於香港，政府要創造有利長遠樓價條件方法就多，過程唔重要，最緊要令樓價短期內出現大幅折讓，上晒全球財經報章嘅頭條，甚至令租金回報率大幅多過定存利率，例如定存5厘、租金回報率10厘。

同時想受更多人玩嘅話，將持貨成本例如差餉地租同租金收入嘅稅項減至接近象徵式，並效法英國限制地租，香港都可以立法將管理費每年遞減。買入價夠平，揸住又唔怕費用反咬一口，炒家聞到陣徐，自然會走埋嚟入市，去咗新加坡都忍唔住返嚟掃幾間，有如當年淘大沙士價一樣咁傳奇。

婆婆媽媽減辣係冇用，乜都唔做就益新加坡，任由樓價每年跌幾%又有排捱，遲買平幾球心態蔓延，只會更少人入場。如果要令樓市牛市重啟，其實答案好明顯啦。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周六刊出