雅虎香港財經 笑到最後｜日本教你如何做盛事之都（高明）
財政預算案其中重點係打造盛事之都，同一時間亦重新徵收酒店房間稅。其實係一個好有自信嘅舉動。
美股外幣即時報價 多國新聞任睇
日本比疫情前更熱鬧
高明啱啱返完鄉下，睇電視仲不停討論點樣收遊客多啲錢，例如直接食拉麵外國人食要收貴一倍，不停討論如何趕客。上網畀足酒店錢，到現場又屈多幾百円房間稅，冇擔心過嗰一千幾百令你唔嚟。中國香港打算喺呢方面學足，證明香港真係一塊福地。
三年後再返鄉下，感覺上日本比疫情前更熱鬧，當然，旅客數字上並未重返2019年高位，同中國旅客大幅減少有關，熱鬧嘅感覺應該嚟自好多不同國家嘅人都去日本旅行有關，東亞遊客佔整體冇以前咁高，日本旅遊局數字顯示，2019年70.1%遊客嚟自東亞，2023年降至62.5%，歐美同東南亞嘅遊客都增加咗，一行街就明顯睇得出。
日本雖然喺好多定位上好先進及突破，最新包括豐田（TM）一直堅持混能車比全電動車更環保嘅睇法，終於得到世人證同，但有去過日本嘅人都知，日本人嘅堅持亦都未同國際接軌。最簡單支付系統，同國際接軌就係用Apple Pay或Google Pay，但行勻成個日本，除咗少量連鎖店，大部份卡機都唔支援Apple Pay及Google Pay，只接受實體卡。
又例如飲食，先進嘅國家會將餐飲視作科技業，利用「科技與狠活」嘅高科技合成劑，簡單少少嘅應用就係檸檬茶唔再用檸檬，亦可能冇茶葉。不過，喺日本見到連鎖中華料理竟然廚房仲有個師傅喺度炒飯，非常落後。不論係住酒店、支付定飲食，都充滿住唔嚟罷就下一位嘅暗示。
貨幣貶值全線半價
不過，淨係2024年頭兩個月，球王美斯去日本；同期Taylor Swift開演唱會；美國富豪朱克伯格去日本又周圍打卡，雖然「內循環」唱好返麥當勞（MCD）。好多唔同嘅遊客進入，再加上名人出現，日本喺冇發力仲暗中趕客情況下，客觀上有盛事之都嘅效果。
日本疫情後之所以成為盛事之國，主要做咗一件事，就係將貨幣貶值。以美元計，去日本買任何產品，至少都係半價，並且獲得日本嘅質素。日圓啱啱大幅貶值時，兼夾有西方傳媒唱好，5-6折去日本旅行嘅言論，說好咗日本故事。
射煙花激光，唔夠半價吸引，任何想成為盛事之都嘅城市，都要反思旅遊界天花板日本做緊半價，有啲咩可以吸引旅客，由一個半價嘅天堂，改去一個收緊正價嘅地方？
不過，香港行聯滙，港元背靠高息強美元，比起正價，每使一美元，更會損失埋5厘息，呢種息口環境，香港做國際收息之都容易過做盛事之都。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
