雅虎香港財經 笑到最後｜東升西降 半導體彎道超車？（高明）
近期幾單新聞嘅綜合，都會發現東升西降是對的。
美股外幣即時報價 多國新聞任睇
日企計劃2027年推2納米晶片
Canon佳能10月13日宣布已開賣採用「納米壓印（Nano-imprint Lithography；NIL）」技術、可用低成本製造高性能先進晶片的微影設備「FPA-1200NZ2C」，用嚟生產現行最先進嘅5nm邏輯晶片，且經由改良、期待可進一步用來生產2nm產品。彭博社報導，有別於現行ASML（ASML）嘅微影設備須藉由曝光、將電路圖案刻喺晶圓上，NIL技術則類似吸印仔咁、直接將圖案壓印喺晶圓上，因可一次性就形成電路，縮短製程時間、更慳電。
啱啱先講完2納米，兩個禮拜之後，日本官商合作嘅半導體企業Rapidus會長東哲郎喺東京都舉行嘅「內外情勢調查會」發表演說時，指出Rapidus計劃2027年量產2納米晶片計畫，認為「非常有信心做到」，除了計劃的2奈米晶片，「也考慮研發1納米晶片」。
當然，2納米同1納米暫時都係未成事階段，即係概念，但吸印仔技術明顯係直接挑戰ASML先進製程唯一嘅地位。
日圓平引外資流入
日本半導體技術東升西降，但其實唔算彎道超車，事實上，日本本身係半導體大國，直至2002年台積電（TSM）聯合ASML研究浸潤式光刻技術，打敗日本Canon及Nikon，之後舊霸權沒落新霸權崛起。就算日本超前都只係重回佢本身嘅位置，何況仲未係。
半導體設備製造商亞太國際電機Kokusai Electric（6525.TYO）今個月IPO集資約7.2億美元，係近五年嚟日本最大嘅集資額。亞太國際專門生產沉積過程嘅設備，喺硅晶圓上塗一層薄膜。三星電子係亞太國際嘅頭號客戶，6月季度嘅收入有四分之一係嚟自三星。亞太國際業績唔係咁好，但上市招股價1,840日圓， 升44.78%至2,664日圓。同係半導業架構仲要更上游嘅ARM（ARM），已經跌穿51美元上市價。
唔講太複雜嘅嘢，日本政府觀光局最新公佈旅客數字，9月訪客人次218.48萬名，按年上升9.57倍，同2019年相比收窄至單位數嘅3.9%。點解咁多人去？除咗基本因素強之外，日圓平係主要因素，事實上，好多大國嘅崛起，都係源自一個平字，成本平過其他地方，吸引外資流入，從而學晒各家所長，從而有錢研究其他科技等等。
近年新加坡因為資金流入，各行各業興旺。其實相對新加坡，另一基本因素更強嘅日本，已經處於再崛起狀態。過去幾年差唔多業務嘅股份擺喺美股上市較易有溢價，到今日竟然日股比美股仲好，未來十年，日股將會以「再興市場」嘅形式影響世界。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
