笑到最後｜港交所何不撈埋嚟做股市夜市？（高明）

延長交易時段至夜晚12點，可能係夜市的奇招。 (LewisTsePuiLung via Getty Images)

首先，唔係講夜期，係講開夜晚嘅現貨市場，即係過往所講嘅「延長交易時段」，延長到夜晚12點。

下載Yahoo財經APP

美股外幣即時報價 多國新聞任睇

黑夜 係後生嘅世界

香港要搞夜市，老實講，黑夜，係後生嘅世界，可以由朝早直踩凌晨，稍為瞓兩個鐘再去上堂返工，大概得讀大學到30歲左右有咁嘅體力。本身搞夜市目標只可以係年輕人，咁上下年紀，一係完全放棄日間活動，4至5點先起身，都仲勉強可以捱夜。

現時吹嘅夜市概念，似乎唔係針對年輕人，而係上咗年紀有閒錢嘅人，想佢哋拎啲錢出嚟消費推動經濟。

香港嘅大額消費，除咗買樓，一定係買股票，股票買買賣賣，更加唔似買樓坐死。搞夜市賣40蚊串魚旦，執嗰一百幾十蚊錢，股市定夜市對香港重要啲？點解唔大膽啲，撈埋嚟做股市夜市，將大笪地概念應用喺股市上？一方面鼓勵啲人入市，另一方面又可以做埋夜市。

交易所租西九展館開大笪地，必須現場親自落盤，即場買賣。 (ASSOCIATED PRESS)

大笪地炒股 親自落盤

具體教埋你點做都得：4點收市後休市2小時畀啲從業員食吓飯，6點再開晚市時段，直踩到凌晨12點。同日間交易時間唔同，晚市係不設「外賣」，唔可以打電話落盤、唔可以上網落盤，話之你小股民定上市公司主席，要親身去港交所（0388.HK）或者經紀行落盤，長遠甚至撈埋西九，交易所租西九展館開大笪地，必須現場親自落盤，即場買賣。

如果日頭同夜晚玩法一樣，當然冇咁吸引。大笪地嘅精髓，係令上唔到舖嘅產品，都放喺地攤經濟度賣，股市用途係集資，可以賣吓啲一百幾十萬元市值嘅公司，即係華爾街狼人入面嘅粉紅單（pink sheet），一樣地攤咁囉埋出嚟賣。甚至可以免開戶口買賣，用支付宝買港交coin買股，收市兌返晒港元，方便即日來港自由行玩兩手。

因為股票投機會令人分泌多巴胺及內啡肽，情緒亢奮之吓老一老都好精神，情況有如台灣成人展三上悠亞令到坐輪椅嘅人企得返起身一樣，解決咗只有年輕人先可以捱夜嘅體力限制。

大家可能會問，冇得親身去買賣嘅人，個價郁咗咁點？呢個正正係關鍵所在，夜市提供「誘因」畀投資者夜晚出去，6個鐘晚市完結又要去食嘢飲酒，一樣可以帶旺消費，外資都要請多個代表夜埋睇住，放工又係要去食飯飲嘢鬆一鬆，咁咪創造咗夜市嘅需求出嚟囉。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周六刊出