雅虎香港財經 笑到最後｜港股新年連跌 因為未有資產增值稅（高明）
2024年港股投資者太悲觀，累到恒指連跌7日挫950點，文章出街時唔知守唔守得住16000點水平。股市嘅嘢唔係升就係跌，連跌7日、連跌70日，其實都好平常，但係如果硬係要喺呢7日搵個解釋，背後原因，就係香港開徵資產增值稅嘅立法得太慢太遲。
美股外幣即時報價 多國新聞任睇
有資產增值稅 股市有升冇跌
財政司司長陳茂波提及資本增值稅屬政府研究範圍之一。類似論調2021年已經講過，當時又係「不能絕對排除」嘅拖嚟拖去論調，就係因為當日嘅拖，種下過去兩年港股不振嘅禍根。因為樂觀嘅投資者睇到，主要市場定立資本增值稅後，股市只會有升冇跌。
以近期創33年新高嘅日股為例。戰後日本高速發展，政府對於資產增值的稅收政策進行了多次調整，最近代嚟計，1998年開始徵收股票資產增值稅。1998年初日經指數為15268點，期間經歷廿幾三十年經濟迷失，最近升至34441點，升1.25倍。
人間地獄英國，自1965年引入資產增值稅，根據倫交所網站，富時100指數1984年成立，開始點數1000點，至今英國據稱「冇啖好食、歧視、人工低、日落國」，富時指數最新為7654點，升7.6倍，1965年至1984年唔計都一樣倍升。
至於美國，1913年開徵資產增值稅，最新長期資產增值稅率為0%、15%或20%，短期增值按普通所得稅率徵稅，最高可達37%。當時至今嘅美股表現，再包埋較近代先成立嘅納指，回報幾驚人有目共睹。
從實證角度已經得知，主要股票市場引入資產增值稅後，只有升，沒有跌，香港咁多年都未有，所以咪唔升唔跌，到近年終於令國際投資者唔耐煩，為咗冇資產增值稅而撤資。
港股未開徵 股民亂炒
對一個普通投資者嚟講，過去港股因為冇資產增值稅，所以股民立亂炒，根據國際慣例，一般資產增值稅通常對短期交易的資產徵收較高稅率，而對長期持有資產徵收較低稅率，為坐貨提供「誘因」，而資產虧損可以用來抵銷資產增值稅，加強一般投資者汰弱留強調整組合嘅決心，亦都解釋到美股點解長升長有。
至於資產增值稅導致走資之類嘅質疑，只要叫佢哋望一望美股，一樣有資產增值稅，亦唔會導致走資。現時香港立法速度明明有史以來最有效率，資產增值稅拖拖拉拉令投資者卻步，想港股升到好似美股一樣咁勁，資產增值稅，即刻做、抽多啲，香港真係一塊福地，到時想窮都幾難。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
