笑到最後|爛尾斷供潮 最後一定搞得掂(高明)
市場傳聞,中國出現爛尾樓、準業主停供潮之類,由於絕大部份新聞源自於美國傳媒,本欄向來直接追查的簡體字的新聞來源反而少之又少,高明刻意上百度搜尋有關停貸及爛尾樓的新聞,差唔多搵唔到,正常AI演算法操作,亦都不見得喺佢哋圈子內係一個熱門話題,所以,停供爛尾等消息可能係舊文,甚至是假新聞。正常人見到呢類新聞,第一個反應係唔好信。
美股、外匯、加密貨幣免費即時報價,自選投資組合獲取相關新聞提示。
不過,作為思考訓練,假設真係有呢件事發生,究竟會發生咩事?因為有美資傳媒指出,目前中資銀行未償房貸餘額高達38兆人民幣,對陷入財務困境房企的放款餘額約13兆人民幣,整體違約率為0.3%,報導引述官方稱整體金融環境穩定,而銀行稱只影響財務的1%。
因為按揭貨款不良比率低,所以受銀行歡迎。2020年底,人行聯合銀保監會發布《關於建立銀行業金融機構房地產貸款集中度管理制度的通知》,給金融機構分檔設置了房地產貸款佔比「天花板」,六大國有行均位於第一檔,它們的房地產貸款佔比上限不得超過40%,個人住房貸款佔比上限不得超過32.5%。整得上限,亦即係如果冇限制,銀行唔介意做得更多。新浪財經報道,大行嘅個人住房貸款佔比都超過三成,亦都可以知道銀行搵食來源喺邊度。至於點解其他貸款不良比率會高,由於官方新聞冇講,所以本欄都唔知道。
銀行存款無端端派息,因為收咗你啲存款,放貸畀第二個,賺息差。如果真係有爛尾潮導致收唔到樓嘅業主斷供,銀行貸出去嘅本金收唔齊,又會影響到存款。
待經濟增長 時間換空間
同一間外資傳媒另一報道又引述消息指出,中國監管部門正考慮給予爛尾樓業主還貸緩衝期,降低停止償還貸款事件的風險。報道指,內地銀行將暫時擱置針對爛尾樓業主拒絕支付房貸的司法訴訟,寬限時長將由地方政府和銀行按照項目情況而定,預計將有助安撫買樓人士,及短期緩解市場對行業的悲觀情緒。
事實上,內房股負債比率高、毛利率低唔係第一日知嘅事,市場大,犧牲財務穩健,爭取高速增長,已經係咁多年嘅成功之道。延長緩衝期等延長措施,其實就係時間換取空間,好似過去咁多年咁,樓市唔掂,可以等經濟增長追上,總體追唔上就等個別行業例如科技補習之類高增長,從業員搵夠自然會買樓幫手承接;另一邊廂資本市場又可以等牛市出現,批股集資;再唔係分拆業務上市,例如看更將佢包裝成物管,又集幾百億繼續高增長故事,唔使說好都大把外資落疊。
簡單嚟講,就好似打牌咁叫糊,只要經濟增長高速、個別行業崛起、港股出現牛市、港股唔太差可以分拆業務上市,拖到是旦一樣打出嚟,已經可以食糊收錢。正常情況下唔會全部嘢一齊唔掂。
所以結論係即使真係有爛尾樓、準業主停供潮之類,最後都會搞得掂。
高明
facebook:https://www.facebook.com/bigricetea
IG:https://www.instagram.com/koming.usstocks/
作者簡介︰賺錢係目標,炒股係手段,專欄記載由手段到目標嘅過程。
本欄逢周三刊出