雅虎香港財經 笑到最後｜私有化潮恐令香港重返IPO第一（高明）
香港首季IPO集資額排全球第十，最新消息，航運港幣吞吐量亦失去十大位置，被剛剛嚟香港準備開家族辦公室嘅皇室親戚阿里嘅祖國社拜超越，四個支柱兩個跌吓跌吓好快會從全球睇吓消失，始終全世界都爭緊用家嘅注意，全球十大勉強都有人見到，跌出十大後，注意力就開始減退，除咗自己仲可以拎十五大、二十大嚟吶喊助威之外，整整吓真係冇人睇到。
美股外幣即時報價 多國新聞任睇
金融仲有得救
航運可能真係低潮，但金融仍然十大，仲有得救，特別係，最近嘅私有化潮，相信係令港交所（0388.HK）重上集資額首位嘅契機。
私有化，即係退市，大股東買返公眾持有嘅股票，變返一間私人有限公司。
香港股市舊年有19間公司申請私有化，其中9間已經完成退市，包括海通國際同松齡護老集團都係今年初退咗市。而今年到而家為止，有最少10間上市公司被提出私有化嘅要約，涉及嘅市值總共超過2,393億港元。
李寧曾傳出私有化
至於未來，除咗幾間外資公司直退市或二次上市，同埋一啲中小之外，路透早前消息指，李寧（2331.HK）考慮將佢嘅公司私有化，有指原因係覺得公司喺香港市場嘅估值偏低。李寧回應冇明確否認，只係表示會考慮任何能提升投資回報嘅方法，包括可能嘅派息或者其他措施，但佢強調目前冇任何具體計劃可以公開。
可見唔係淨係得外資同生意較弱嘅中小型股份，李寧市值445億港元，曾經每隔幾年都係一隻當炒股，一旦退市又少好多周邊產品喺港交所發行。
近期facebook先有執笠關注組，後有開張關注組，本欄明白到，香港已經唔再係過去謹小慎微嘅打工仔心態，正式進入「大破大立」嘅思考模式。正如有執笠邊有開業，冇退市又邊有上市。
最經典例子，要數阿里巴巴。阿里巴巴集團最初於2007年喺港交所進行IPO，第一次嘅股票編號係1688。到咗2012年，因為股價未如理想同埋市場對佢哋嘅B2B業務模型有誤解，決定喺香港退市。2014年，阿里巴巴再次喺美國紐約證券交易所上市。後來喺2019年11月，阿里巴巴（9988.HK）喺香港交易所進行咗第二次公開發行，再次回到香港市場。
由於香港上市實在太成功，爭啲帶埋旗下螞蟻金服上次，今年又爭啲帶埋菜鳥上市。如果呢兩間公司都有喺香港上市，現時香港嘅上市地位肯定有所唔同。從現時私有化退市公司規模睇，就算李寧私有化，最多都只算中破，一定要有騰訊（0700.HK）或阿里巴巴等退市先為之大破。一旦佢哋都選擇退市，港交所可以即時啟動銷售策略，遊說佢哋好似當年阿里巴巴咁重新上市，一年一隻，到時集資額肯定又重返世界第一，所以香港真係一塊福地。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
