雅虎香港財經 笑到最後｜美股破壞性創造亦有盡頭（高明）
破壞性創造Disruptive innovation呢個字係最近廿年發明，有望過美股都知道，破壞性創造嘅升幅係最驚人，因為透過掠奪現有市場去達至盈利，而先進嘅科技或諗發喺初期未有其他企業跟到，享受一段時間嘅壟斷。
美股外幣即時報價 多國新聞任睇
事件嘅本質就唔係淨係呢十幾廿年先有，任何轉變，都必會破壞現有價值，例如發明燈膽後，蠟燭生意就息微；汽車出現，馬車只係得番量度單位匹數有意義咁存在；又例如上一次人類最大規模嘅大航海時代，出海洋運貨航道亦破壞咗原由陸路同運河等嘅航運路線，種種以前都講過，唔再重覆。
但係破壞會去到咩程度，又未必完全取代得哂，現有參與者亦會反抗。最明顯嘅例子，就係Visa（V）同Mastercard（MA）兩間都係信用卡公司，亦都係美帝霸權嘅象徵之一，本來有新嘅電子支付，即係由PayPal（PYPL）開始一路數到Stripe，甚至加密貨幣出現，如果管理層純粹打份工，相信唔難令兩間企業變成美版八達通，坐享現有地位收夠籌就算，任由其他例如QR code、NFC等喺身邊擦身而過，到其他人大咗先追。反而，現時新興嘅虛擬銀行要投靠Visa同Master出卡，例如CoinBase卡合作嘅都係Visa，扣戶口嘅加密貨幣，找數時都係按交易嘅滙率幫你計返數。
現有行業可轉型求存
另一個新嘅例子，就係網購相對零售店。網購慳好多租金同裝修，對零售直接衝擊。美國今年第二季，零售舖空置率跌至6.1%，係15年來新低，購物中心嘅租金亦較5年前高16%，淨新增2,600間舖，佔地約2,300萬平方呎。
高檔A級商場，例如Simon Property Group（SPG）及 Macerich（MAC）
出租率已經超過九成，回復到疫情之前，唔難理解有錢人就搵人嚟服侍，窮人就自己上網入機，但係最重要原因，仍然係縮減供應。
1970年以來，美國起購物中心嘅增長率係人口增長嘅四至六倍，由1980年每名美國人平均有12.7呎購物空間，一路升到2008年21.6呎，之後金融海融停滯，至今都仲係21.6呎，數字仍然係法國同英國嘅兩倍，中國嘅8倍，可見當年幾超前，金融海融14年，都冇增長過，零售點喺多重打擊之下，終於搵到佢嘅定位。
破壞性創造並唔係完全消滅現有行業，有啲會跟住轉型，有啲直頭減供應減到合理為止，科技門檻細咗，傳統店轉型比以前簡單，兩者分野都唔一定咁明顯，究竟香港科技探索（1137）旗下HKTVMall係網店定實體店都講唔清。可以預期已成為建制嘅企業有一段長時間都唔會被挑戰到，商業世界格局不變安心屈機，美股整體股價仍然係非常樂觀，當然代價就係大家活喺一個有得揀嘅假象入面。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
