雅虎香港財經 笑到最後｜美股還有投資價值嗎？（高明）
1.寫過幾期港股、港樓嘅投資價值，作為平衡，美股仲有冇投資價值，亦都值得探討。特別係依家持貨美股，股價唔上唔落，另一方面，平衡時空下美元有條件嘅活期可以達4.5至4.8厘，連定期綁一兩年都慳返。一邊利息日日賺，另一邊股價唔上唔落，作為投資者值得審視。至於投機價值，iPhone 15、生可樂都有投機價值，以下從略。
美股外幣即時報價 多國新聞任睇
2.課本會教美債息口係無風險利率，因為門檻同各項監管，一般平民化，應視活期及定期利息為無風險利率。當然都可以話有風險銀行會執笠等，但正常情況都唔需要承擔價格下跌風險。
3.股票唔同住宅物業，住宅物業有住嘅功能，自置物業同租用物業嘅享受程度不一。即使港樓已經冇投資價值，買嚟自住仍然係個人選擇，可以當消費。
4.股票就唔同，冇得自住，美股股東多如天上繁星，買咗一隻企業嘅股，入去嗰間公司，都要正常磅水。唯一特權就係入股東大會投票，有時會有啲甜頭畀大家，但美股股東會喺美國開，高明咁多年只係去過一次巴郡（BRK.b）股東會，入面有地攤經濟，股東買嘢都係要課金，公司雙贏，股東買完股票，再去股東會畀股神劏多次。
息口預期主導
5.返去投資價值，不得不提價值投資法。某女股神早幾年講過，價值投資已經失靈。佢解釋得唔夠清楚，事實上，當年零息年代，冇利率作比較，價值投資的確近乎失靈，股票之中，負債高、未有盈利嘅企業升得更多，價值投資法嘅另一招買債收息，息口亦偏低，當時話價值投資法失靈係正確，但係倒返轉，股票嘅投資價值亦甚高，存款完全冇利率，求其一隻嘅派息、回購產生嘅價值都高過現金，如果低息一路維持直到永遠，現金同債券都冇持有嘅價值。
6.今年以來美股走勢，雖然部份受AI加持，但係息口預期仍然主導。美股價值嘅最大危機，就係美帝新聞同資訊太自由，每個禮拜必定有以下其中一類數字公佈：通脹率、工資、就業、議息結果、議息紀錄，本來已經左右股價，再加上美帝金融班底太成熟，操作有如港產電影所講嘅「千門八將」，有人做主角，有人做軍師，有人負責造謠生事，即係英文所講嘅控制預期。搞一大輪股票組合升跌相抵，回報高唔過收利息，不如唔搞慳返啲時間自己去威仲實際。
7.好玄妙咁講，現時美股係冇投資價值，同時，亦係價值投資法嘅最好時光，可以一邊收住利息，等待有投資價值嘅股票出現，再等待天降黃金雨嘅時機來臨。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
