雅虎香港財經 笑到最後｜ARM上市 點解晶片一個國家搞唔掂？（高明）
根據日經亞洲報道，SoftBank軟銀旗下嘅英國半導體架構公司ARM 計劃於 9 月喺納斯達克上市，賣唔成比Nvidia（NVDA）之後最終都係要上市易手。軟銀持有ARM 75%，其餘以軟銀願景基金名義持有，淨係呢間公司嘅架構，已經係晶片全球化嘅象徵：英國公司、日本持有、美國上市。最新美國總統拜登行政機關嘅行政指令阻止對華高科技嘅投資，ARM就全球合作上市，都可以話係一個新嘅常態。
美股外幣即時報價 多國新聞任睇
不得不題軟銀孫正義嘅眼光，雖然近期Wework（WE）經營困難，但係2016年買ARM眼光好準，嗰時仲未有咩晶片短缺，另一架構X86又更加盛行，軟銀以當時320億美元收購ARM後除牌，到舊年差啲賣畀Nvidia達400億美元現金加股權，因過唔到監管機構而告吹，現時計劃上市估值則達700億美元， 遲賣貴幾舊之餘，現時嘅戰略價值重大，反映咗當日嘅眼光，「無乜人講，咪我買囉。
國際形勢不容許
ARM 係晶片架構公司，喺智能手機用芯片方面佔有超過 90% 全球市佔，近年獲授權嘅設計廠商慢慢將架構伸延至電腦、伺服器晶片上，人工智能晶片亦當然有份，一旦上市成功亦係另一隻AI股。
晶片行業嘅細分，喺ARM公司入面表現出嚟，晶片架構同埋晶片設計雖然都係知識產權，但係佢哋仍然係兩個分開嘅領域。晶片架構係一個高層次嘅藍圖，描述晶片嘅基本結構同埋功能；而晶片設計就係將呢個藍圖轉化成實際產品嘅過程。呢兩個過程可能涉及唔同嘅技術、專業知識同埋供應商。
食腦嘅部份都已經明顯分咗兩部份，有份圖交出去後，又係另一次環遊世界，例如，晶片嘅架構設計可能喺美國進行，物理設計同埋佈局可能喺歐洲，製造則可能喺亞洲嘅台積電（TSM）或者韓國三星。大家都知光刻機嚟自荷蘭ASML（ASML），當中最重要嘅光學材料，嚟自德國嘅Carl Zeiss，上述幾間有題到名嘅公司，又有好強烈嘅股權關係。
半導體原材料主要來自日本，近年被外界認為喺原材料入邊壟斷，因為日本掌握咗先進嘅化學技術同埋精密製造工藝，令佢哋成為全球主要嘅晶片原材料供應商。呢種全球化嘅合作唔單止係效率使然，都反映咗晶片產業嘅複雜性同埋多樣性，唔係話邊個國家一國之力可以搞掂。
所以個複雜性遠超佔有其中一範，例如就算有台積電，如果冇光刻機都冇用；又例如自主研發到EUV光刻機，唔夠原材料供應，又等於茶餐廳有飯煲但冇飯賣一樣。美國政府如果想自己一國之力研發、製造晶片，差啲想自主研發埋光刻機、做埋材料，諗法雖然好有「美國芯」，但係國際形勢唔係咁囉。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
