雅虎香港財經 笑到最後｜JPEX後如何向前看 4大正能量位（高明）
JPEX事件，撇除藝人KOL被拘捕食花生，以及部份投資者無法出金，由於事件已經發生咗，現時最需要做嘅就係向前看，以下有4件事值得發放正能量看前看。
1. 港股必成最大贏家
曾經，去中心化成為宗教口號，港股兩大競爭對手：美股及加密貨幣，美股近期因為息口可能維持高水平一段長時間，尚未成氣候；加密貨幣更因JPEX事件，令到佢喺香港嘅形象跌落谷底。呢個時候，財政司長陳茂波應將加密貨幣嘅Agenda放埋一邊，轉章力谷港股，因為港股再不濟，都仲有萬七八，沽貨離場，肯定可以攞返本金，唔沽有賭未為輸都仲有得博下，相反另一邊出金手續費99%，肯定冇望。如果陳茂波要平衡港股同加密貨幣嘅角色，其實亦可以搵港交所行政總裁歐冠昇（Nicolas Aguzin）出嚟唱好港股，台詞都幫你寫好：恒大（3333）都復到牌，你JPC幣（JPEX旗下產品）得唔得？
2. 冇投資JPEX嘅大多數
一個明知同日本冇關嘅牌子，表面證供相當可疑，都仲吸引到咁多人6-7位數字投資，人數相對700萬人只係少數。冇買嘅人冇損失財富，而損失咗嘅財富好大機會唔會再流入香港。財富係相對，冇買嘅人無形地變得富有，潛在同你爭奪現有資源嘅競爭者減少，例如，半島酒店（大酒店（045））下午茶，JPEX投資者輸錢應該冇心機去食，排短啲條隊，都係體現財富效應嘅一種方法。
3. 香港僱主
當年Crypto高位回落，網上流傳美國麥當勞有廣告招聘Crypto投資者做McJob，有fact check網站指係改圖。但不爭事實係，好多美國加密貨幣投資者要重投勞動市場。今次香港係翻版，近期香港雖然有官方統計嘅回流潮，但係請人仲係困難，JPEX事件提供大量誘因令到投資者重投勞動市場，對整體經濟必然有利。香港政府與其畀假希望投資者可以取回本金，勞工及褔利局局長孫玉菡不如出嚟話會幫投資者全力搵工，向前看。
4. 倫敦物業業主
一般嚟講，俄羅斯寡頭、非洲元首、中東富商、其他第三世界發財人士，嗰類人會選擇去倫敦買豪宅，唔會揀紐約、唔會揀新加坡、唔會揀香港，冥冥之中鍾情倫敦。JPEX今次雖然有一小撮投資者無法出金，但不爭嘅事實係，有另一更小撮人因此發達，相信都係嗰類人，最終資金都係去倫敦買豪宅。大家可能會問：香港人點會受惠？近年搬去英國住嘅香港人最多都係中產，買豪宅關佢咩事？因為成個集團唔係得最頂層，一樣有中產服務，成個組織相信唔會留喺香港，當中一定有中產樓宇嘅需求，資金流入英國，即使加息之下，英國樓價出現下跌，有承接力都係好消息，好過其他冇承接嘅樓市。
網上世界有將留港同離港嘅人分化成兩批人，不過，一場JPEX風波，英國香港同時受惠，所以向前看嘅正能量真係好重要。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
