絲絲講場：宜家CEO話「漂綠」好過乜都唔做

布羅金話，要話畀人聽公司為環保做咗啲乜。

 

嗱，香港股市術語「染藍」、「染紅」你就聽得多，但依家Out晒㗎喇！家陣興「染綠」，一間接一間公司走出嚟話自己做環保、要減排、要減碳，N年後零排放喎。唱反調嘅人就梗有嘅，唔少人覺得搞「綠色投資」只係形象工程嚟，實情為幫公司「漂綠（Greenwash）」博市場好感也。

「漂綠」亦即係口講話綠化，但其實淨係做表面嗰浸，內裏都係做唔到嘅。對於呢個「綠與唔綠」嘅問題，瑞典家居巨頭宜家家居（IKEA）嘅行政總裁（CEO）布羅金（Jesper Brodin）近日就有妙論，佢認為「漂綠都好過乜都唔做」。吓，虛情假意都救到地球？

新店主打環保產品

布老闆有解釋嘅，佢話需要畀人見到希望，話畀人聽公司為環保做咗啲乜。IKEA喺30個市場做調查，發現有70%客戶「深切關注」氣候變化，不過就得3%客戶願意為環保產品埋單，結果都幾令人傷心。

所以IKEA正投資可再生能源，又設計出減少消耗嘅產品，仲推出咗一家可持續生活商店，透過產品幫客戶減少浪費、節水同慳電。副行政總裁兼財務總監馬埃斯圖（Juvencio Maeztu）亦都話，由原材料到產品使用壽命結束嘅總碳排放足迹有幾多，IKEA都知道晒。

定價一向唔高嘅IKEA就希望到2030年，賣嘅所有產品都係「對氣候有利」。如果一件產品對環境無害，同時又冇加到價，咁你又點揀呢？