雅虎香港財經 【金手指】詹培忠接受傳媒訪問，親評「佳寧案」（下）
上世紀70至80年代轟動一時的「佳寧案」被改編成電影《金手指》，戲中御用莊家的原型，曾任16年立法會議員、並被稱為「潮州怒漢」的詹培忠，正是佳寧集團借殼上市背後的主要推手，因此被譽為「金牌莊家」。
欲知當年事發經過，由詹培忠解答肯定當之無愧！《金手指》上映至今近一個月，詹培忠現身接受傳媒訪問，以下為其中訪問撮要。
10. 如何形容陳松青？
詹：「佢係屬於『跨時代嘅叻人』，佢有佢嘅闊綽，先俾好處你，某些人你一受到好處，自必然千方百計知恩圖報，而達到佢嘅目的，當然人到成功就大家一齊上好好嘅路程，一失敗呢，個個盡量將責任推俾他人...所以總結嚟計，陳松青先生係有佢嘅手法，亦都好多值得信任，相應嚟計，如果係失敗方面，向失敗走呢，自必然形成一個騙子。」
詹：「總結嚟講，佢係一個時代嘅英雄，陳松青係二十世紀、70-80年代嘅人物，如果俾佢喺香港多十年八年呢，香港就會俾佢搞到亂哂龍，無論如何，歷史已經過去。倘若佢嘅建設性作用，對社會、經濟、金融或者其他，我提議政府部門去研究。若果有破壞性，自必然讓佢就過去囉。」
11. 馬來西亞「神秒資金」存在？
詹：「以我所知，係無嫁...大家要認清楚，馬來（西）亞到依家上任嘅總理，同埋佢嘅太太，到依家都仲坐緊監...馬拉就有個政策照顧自己本土居民，馬拉藉人士可以申請特別貸款，貸款數字可以係1蚊、100蚊、1000蚊、1億，你能夠利用呢個政策，而係去達致自己嘅經濟、金融、政治目的呢，做得好咪成功囉，做得唔好咪怨聲載道囉。」
12. 點睇當年命案？
詹：「呢個呢，會受到法律嘅制裁嘅，咁呢個事實都相當重大...香港人對呢個命案，就非常非常關注，有啲國家可能（對）命案就工作過程中咋嘛。」
記者問：「我哋到依家都唔知，牽涉嘅人命係咪同陳松青有關係？」
詹：「我哋只能從法律嘅判決，當時仲有一個司機，佢喺法庭講出嚟，法官都唔接受，香港最尊重係法官嘛。」
記者問：「陳松青身邊嘅人都好危險？」
詹：「我從來都未經（歷）過呢啲嘢，世事嘅嘢呢，近朱者赤近墨者黑，你自己心中有數，心清就無毒，如果有參與，你自己唔驚都要驚嫁啦。」
13. 若有機會，你會再做陳松青的莊家嗎？
詹：「我其實到最尾叫佢走啦走啦，股票怕支持唔到...即係對沖基金去賣嘛，最低限度保住，但你死托，托唔掂嫁嘛，到最尾你梗會走嫁，長城唔係一天建立上來...所以我忠於職守，我做我嘅股票呢，就好合理，我當時關係已經好密切，但政府心目中，你哋經紀係small potato。」
詹：「實際上整個佳寧事件，點樣會造成咁...當時政府出咗4000萬做報告，呢個報告做到最尾呢，應該係胡官個舅仔，另一個退休法官係做報告，所以到最尾4000萬洗哂，報告就做唔成，達成一個結論就佳寧事件點會咁樣收場呢。」
詹：「我只能夠講，建立喺沙堆上嘅大廈遲早會冧，其中有些專業人士，都有一定嘅責任，包括律師、會計師...經紀就少啲，因為經紀有生意就做，唔係幫佢揸fit，唔係俾意見佢。」
資料來源：https://www.youtube.com/watch?v=Xu8YTidGFXk
你或許有興趣
【本港樓市】預售樓花1月捧蛋，4個月第3次
【印度股市】印度連番破頂仲值得睇好？
【港股投資】有消息炒！港股突然升近600點，可惜仍受制下降軌
【里昂風水指數2024】中信里昂料恒指在甲辰龍年夏季後可平步青雲
【中國股市】彭博：中國據報收緊境內外投資者交易限制
如欲觀看更多相關文章，請瀏覽 Market Digest
