雅虎香港財經 金缸經｜走塑如走數屬從善如流
講咗一段時間嘅走塑終於真係要做喇，觀乎大家反應，一係就對啲紙餐具發洩，因為遇熱就變型，尤其係啲熱湯類，變臉隨時快過條女。所以另一邊就係講自己帶餐具，唔明要嘈乜。有啲就直情話人用即棄膠餐具就係害下一代，有啲就話啲環保團體麻鷹唔管管雞仔，即係啲有錢佬坐私人飛機唔嘈，啲大型工廠排污水排廢氣唔嘈，只係識向窮人開刀。
呢啲口水戰真係好多時只係睇你觀點角度，啲膠製品難分解係真，但擾民亦係真。環保呢個議題，包裝咁靚一定無話係錯，但推嘅時機係咪好，而呢個時機又引伸出乜嘢動機，就值得探討下。之前講過租金唔係唯一香港營商問題，我無意幫大業主，亦無意壓窄小店，舉的例子都是上市公司，大家點解讀無得控制。
講返正題，走塑對營商尤其係食店帶嚟幾多壓力，好似無乜人探討。業主加租，我唔信係普遍現象，屯門刀削麵單嘢，咁嘅舖頭都可以屹立到而家，如果租金高一早執咗。但走塑真係影響晒所有食肆。
香港餐飲聯業協會會長黃家和之前接受訪問，話「竹、有機纖維或木製餐具，整體比塑膠餐具貴，但程度不是不能接受」，仲話「成本每支1毫的塑膠飲管，紙飲管約貴幾個仙，即約30%，但竹製飲管成本則增至2毫至3毫」。當然，呢啲成本本身佔整體成本比例未必好高，但人工貴、租金唔平、消費重心北移，消費能力減弱，營商壓力咁大，有啲成本一下加3成甚至更多，小數怕長計。
香港經濟情況有目共睹，如果好景時唔做，逆境時用咁複雜嘅方法另類加稅，再削弱小商戶向上流動機會，經濟真係會改善到？有啲團體講得再冠冕堂皇，佢哋唔使考慮社會承受能力，社會嘅矛頭都唔會指向佢哋。環保處個綠色餐具示範記者會，根本係公開處決呢啲環保嘢。既然時機、市民及供應商都完全唔適合，政府真係要認真考慮下，係咪值得冒咁大險呢？
金缸經
註：專欄作家言論不代表本網立場
