雅虎香港財經 金融花生│前世作孽 今世炒港股（言平）
話說，近排坊間流傳一句話︰「無論你前世造咗咩孽，今世炒港股都算還清晒喇！」呢句說話睇落只係笑話一則，但諗深一層，散戶對港股嗰種悲憤，真係隔住個芒都感受到。又難怪嘅，港股足足跌咗4年！係4年呀！人生有幾多個4年？好命嘅（如果有錢又無病）畀夠你25個，但絕大部分人真正搵錢只有10個4年，然後就支撐退休之後10個4年。無咗1個4年，即係你剩返嗰9個4年要再努力啲喇。
美股外幣即時報價 多國新聞任睇
恆指接近腰斬
2021年2月，恒生指數最高位31183點，而上個月（12月11號）恒指低位係15972點，跌咗成15211點（48.78%），即係接近腰斬，咁嘅表現，如果唔係自己前世罪孽深重，都解釋唔到點解咁大整蠱。你以為新一年孽債還清，有新景象？港股喺令人失望方面，從無令人失望，新一年開局就整個「頭七」你嘆下，頭七個交易日恒指跌足，如果你去打麻雀頭七鋪，鋪鋪出銃，都會輸到無晒信心，血壓飆升、皮質醇偏高……所以解釋到港股點解成交咁弱，好多時連800億都無，唔好話塘水滾塘魚，根本上都乾塘，條魚都變水魚。
藍籌跌得甘 散戶中伏
如果買三、四線股仔，波幅大，風險極高，輪咗都無話可說，但好多散戶買大藍籌，有名有姓有市值，有成交，有代表性，好似阿里巴巴（9988.HK）、騰訊（0700.HK）、美團（3690.HK）、京東（9618.HK）等等，結果隻隻輪住嚟爆，佢哋係藍籌股呀！係經過恒指服務公司千挑萬選，成為恒生指數成分股，結果一樣大跌，重要係腰斬咁跌。
阿里巴巴2020年高位$308，而家得連紅底都穿埋；騰訊2021年高位$757，而家得返$290，跌幅超過一半。美團2021年高位$460，家陣得返$70。當年市場成日吹捧ATM，又話科網股前途無限，股價越升越有，但原來ATM依三個字早藏玄機，Automated Teller Machine，提款機是也，結果一眾股民畀人撳住嚟撳錢。
最後，入返正題（無錯，嚟到總結先入正題），2024年開局咁差，主要係美國通脹出現反彈，12月份CPI升到3.3%，市場即刻擔心美國佬又會推遲減息；另外紅海危機令國際局勢緊張，胡塞武裝份子阻塞紅海條國際海運路線，即係揑住你條大動脈，英美兩國海軍即刻介入；第三，中植集團爆雷，4200億負債點頂？恒大個彈都仲未拆得掂，而家又黎個中植，唔怪得恒指仆直，不斷向下尋低。散戶只能自求多福，做多啲好人好事，積返啲陰德，寄望前世作嘅孽，到此「遺址」……
言平
本欄隔周四刊出
