雅虎香港財經 金融花生│車公教炒股（言平）
今個農曆年初二（11日）車公誕，傳統習俗新界鄉議局主席劉業強都會到沙田車公廟為香港求籤祈福，今年求得中籤，簽文為：「車公靈簽 第十五簽 中籤，斧斤持以入山林，未得之時那處尋；損了良材失卻力，勸君留住待春臨。」
美股外幣即時報價 多國新聞任睇
搵穩陣板塊好唔容易
傳聞（未經證實）為怕求得下簽，影響市民信心，簽筒入邊嘅籤文早已經將所有下下籤、下籤等全部拎走，換言之，求簽結果只會得上上籤、上簽同中簽。無論如何，今次求得嘅係中簽，即係唔係上簽同上上籤，再睇埋籤文嘅解讀，大家就會知道今年龍年都唔會係容易嘅一年。
籤文頭兩句「斧斤持以入山林，未得之時那處尋」如果用財經角度去解讀，就會理解為投資者拎住啲錢衝入個股市森林，希望有所斬獲，但到最後一無所獲，只可以到處尋找。依句理解都好容易明白，而家個股市咁嘅情況，要尋找一個穩陣嘅板塊都好唔容易，例如晶片股、醫藥股、出口股等，又怕美國佬制裁搞事，大家睇睇藥明系跌到反艇，就知道個風險有幾大。
以為避開美國佬就冇事？跟住如果你掂到內房，又怕內房股係第二隻恒大（3333.HK），到最後只會被法院強制清盤。之後同內房相關嘅板塊都唔方有好日子過，例如建築股、銀行股、保險股等，因為借咗錢比內房；又或者投資咗內房發嘅基金或者相關投資產品，最後要全數撇帳，又係輸到車公都唔認得。總括而言，港股好多板塊都好似地雷陣一樣，只要行錯睇錯，隨時都會損兵折將。
投資者轉玩美股 留守港股失信心
所以有第三句︰「損了良材失卻力」。依據可以分為兩種解讀，第一損了良材。而家好多投資者都轉去炒美股，唔玩港股，所以大家成日都聽到一句說話 —「港股已死」。有財力投資嘅投資者都走咗去炒美股，良材大量損失。第二「失卻力」。留返喺度作戰嘅投資者，財力都已經大打折扣，點止失卻力，連信心都失埋。
最後車公奉勸一句：「勸君留住待春臨」，即係話俾大家聽而家唔係春天，唔係投資好時機。不如留返啲錢係荷包穩陣啲。今年11月係美國總統大選，傳統上歷屆總統大選，美國總統候選人都一定會大打中國牌，到時對國內嘅股市或者香港股市，都會造成唔同程度嘅壓力，所以大家都係要綁好安全帶，提防風暴來臨。
言平
本欄隔周四刊出
