雅虎香港財經 【香港行山】天水圍後花園 30分鐘即達 遠眺后海灣日落
今期行山主題去到新界西天水圍，作為其中一個最多人住嘅新市鎮，天水圍也有一個「後花園」，外區人可能都無乜聽過，可以話只有天水圍人先識嘅「淋坑山」。想行淋坑山，交通極為方便，而且好近民居，一條直路行過去只需要半個鐘，但就有無敵海景，仲可以睇埋日落呢！
淋坑山 后海灣專用瞭望台
淋坑山只有75米高，聽落唔算高，不過先提醒各位，該地點唔屬於政府規劃行山徑，所以無工整嘅石屎山路可以走，亦無正式出入口，行時要注意一下路面，因為上山斜路只有山地泥路，頗多沙石，而且旁邊都係雜草，無任何扶手；另一問題就係四野都無大樹，大太陽嘅日子少不免被爆曬，所以最佳時間係下午4、5點出發，可以去到睇Magic Hour日落美景，又能避開最熱嘅時間。
雖然如此，不過間中都有家長帶同小朋友一齊前往，細路仔通常要手腳並用，連爬帶攀先上到去，如果小朋友平時十指不沾陽春水的話，就避免帶佢嚟喇。
出發 天恒/天澤商場
要前往淋坑山，最直接方法係坐輕鐵或天水圍巴士例如K76，於天恒或天澤下車。於天恒或天澤商場，可以買定少許糧水，食少少嘢或者去個洗手間，因為之後都無補給。於天恒及天澤之間公園有一條直路，沿著直路走經過一條小橋，然後已經可以目視到今次嘅主角淋坑山小小身影。去到分岔路口轉左進入天瑞徑，有行人天橋經過排水道，往對岸沿左方直落單車徑，右手邊就有一條樓梯上返地面，就會正式進入山路範圍。
山路直上半小時即達
只要成功找到入口進入山路，就非常容易行，因為只有一條路直上，一開頭兩邊尚有少許半個人高嘅野草及灌木，要小心唔好被枝葉刮傷，路面就係一啲比較細少嘅石級，唔算太工整而且有少許窄，都要小心緩緩往上行。大約行10分鐘左右就會豁然開朗，四野都無遮無掩，反而比較易行；再行多15分鐘左右就上到最高位登高柱，有一個小小平台，就係此行目的地呢！
360度望深圳灣及后海灣
山頂位可以見到有唔少攝影發燒友，捕捉日落后海灣美景，此處仲可以望到深圳河對嘅建築及深圳灣大橋；而呢到嘅景色係360度，只要回望就會望到整個天水圍景色，如果天色晚一點仲可以影到天水圍萬家燈火嘅美景。山頂上尚有唔少人會放下風箏，非常寫意！
路線：天澤商場>天瑞徑>淋坑山
全程：約2.2公里
需時：半小時（單程）
難度：初級
來回交通：輕鐵或巴士
【立即讚好】全新 Yahoo 旅遊 Facebook 專頁
Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！
