2017狗股不太狗

迎接2017年首個交易日，熱門話題自然係新一年買乜好，這時候唔少人又會想起狗股理論。想知2017年狗股有乜選擇，最好就從數據入手。

去年狗股大豐收

如果你已忘記狗股理請係乜，先簡單幾句幫你溫習一下。狗股理論由美國基金經理Michael O'Higgins提出，原理很簡單，只要在年尾或年頭吸納多隻息率最高的藍籌股，一年後再換馬，如此類推，便可望跑贏大市。

以息率高作標準，是因為藍籌股往往因為股價積弱推高息率，一旦股價重新發力，就可以賺價又賺息。去年便有幾隻狗股達到此速效果，弱足兩年的銀娛及金沙，因為澳門賭場收入回升，投資者解讀為濠賭股冰河期結束，股價終於大翻身，分別勁升40.1%及26.9%，另一隻翻身資源股中國神華，今年累計升幅亦達19.9%。

比對恆指成份股表現，單計息率，今年頭幾位入榜藍籌狗股其實不太「狗」。例如排第三、四位的滙控及恆生，前者去年股價由谷底反彈至突破60元大關，後者則持續維持強勢，入選原因是派息實在強勁。所以要找出「真．狗股」，應同步比對股價走勢。股價積弱又派高息，首推利豐及百麗國際兩大狗股，相對2016年，這兩隻股份優勢是價殘及獲大行力撐，隱憂是今年有機會被剔出藍籌行列，連狗股身份亦被DQ。

有膽色的散戶，亦可以留意聯想集團及國泰。所謂有危亦有機，手機市場巨人三星經歷Note 7風暴，暫時處於喘息期，正好製造空間讓內地手機品牌以抵食夾大件優勢搶佔市場，假如聯想下決心以Motorola品牌重振手機業務，只要傳出銷量好消息，跌到殘的股價便有望翻身。至於國泰，本業暫時處於捱打局面，但今年點燃股價上升的契機反而係併購概念。話說建滔化工早前增持國泰，持股量達5.01%，開始引起市場注意，皆因只要付出百多億元，便可以策動收購國泰，這個價錢對內地巨企來說實在濕濕碎，一旦有併購風聲傳出，國泰便有機會成為搶手貨。

「狗股」概念投資工具

除了股票，想把握低吸機會的散戶，亦可以留意一些可望翻身的投資工具。的士牌價近年由高位回落。純粹從基本因素看，被港鐵支線伸延及道路擠塞問題影響，的士吸客量未見明顯改善，但最大威脅者Uber問題亦開始浮面，包括司機態度差又唔識路，新版本App要求乘客先支付車錢，亦激走不少Uber用家。加上的士在今年有機會再加價，加價可以讓車主有藉口加車租，均對的士牌價有利，特別是價格較落後的新界的士牌，受惠中產大舉遷入新界區，客源持續增加下，翻身幅度有機會跑贏市區的士牌價。

另一值得留意的弱勢投資工具是石油，油價維持弱勢兩年多，近月終於見曙光，第一個利好因素是油組決心減產，另一值得留意的利好因素是市場預計特朗普有意與俄國聯手抬高油價，想在年頭捕捉油價開車機遇的散戶，除了可以直接入手油股，亦可以考慮吸納原油期貨ETF，入場費二千多元有交易，較適合資金有限又想分散投資的散戶。