雅虎香港財經 84歲揸的士 經紀可以做到幾多歲？
北角日前發生恐怖交通意外，的士落斜時失控衝向英皇道撞向三名途人，涉事被捕司機年齡高達84歲。當買樓租樓仍要靠真人經紀，究竟物業代理可以做到幾多歲？
美股外幣即時報價 多國新聞任睇
物業代理是「年輕」行業
間中路過舊區，都會見到一些蚊型地產公司，老細兼唯一經紀是一名伯伯及嬸嬸，似乎經紀有心有力，做到84歲都唔難。
參考地產代理監管局的地產代理發牌條件，個人牌年滿18歲、中五學歷及資格試合格即可獲發牌，至於公司牌，公司至少有一名董事持有效地產代理牌、持牌代理實際控制公司地產代理業務、每名董事及公司被地監局認為適合持牌，亦可獲發牌。現時發牌制未有設定申請年齡上限，未有違反地監局指引及在有效期屆滿前三個月即可續牌，理論上要做到84歲較揸的士更容易。
不過參考早年地監局數據，經紀平均年齡只有37.4歲，七成五營業員年齡介乎21至40歲，七成五地產代理介乎31歲至50歲。雖然近年地監局未有披露相關數據，但考慮到經紀日常工作企多過坐又要四出奔波，現時市況平均七名經紀爭一張單，相對可以坐在的士截街客的司機，年過70做經紀已相當吃力，84歲要勝任前線經紀高壓又考體力工作就更難。
中年經紀都有健康隱憂
買樓賣樓遇到84歲長者級經紀機會甚微，反而較有機會是碰到《中年好聲音》五、六十歲經紀，只要有經驗又細心，中年經紀對單位資料及買賣細節要「熟書」都可以游刃有餘。不過中年經紀最大危機反而是忽略健康，早前便有一筆藍澄灣三房交易，經紀為客戶搵盤及協助議價奔波一整天，忙碌至無時間開餐，結果到埋門簽約時經紀竟然暈低，最後由買家購買可樂補充體力，才可以為買賣雙方完成簽約。
上述買樓故事，經紀搏命成功開單當然很勵志，但人到中年忽然暈低可大可小。每年長跑比賽，間中都出現中年參賽者暈低猝死事故，去年甚至曾發生消防總隊目跑步昏迷送院不治事故。為穩陣起見，睇樓時買家賣家，不論經紀是後生仔或中年人，都應該先問經紀「食咗飯未」，以確保經紀不會空肚開工。
延伸閱讀：地產代理經紀考牌 新手入行懶人包
