雅虎香港財經 Bossip｜檢疫酒店在手 老闆更顯有面｜Louise
防疫政策下，檢疫酒店房租「海鮮價」。已有四十年歷史的尖東富豪酒店套房，一晚索價$5,000，簡直山雞變鳳凰，想新淨啲有紅磡嘉里酒店，全海景頂層套房$15,000一晚，但有錢都未必訂得到。
訂檢疫酒店要識人
近排經常收到朋友來電：「Louise ，有無識人呀？Book唔到檢疫酒店呀！」乜訂檢疫酒店要識人嘅咩？
有位金融大姐正為仔女返港而四處張羅檢疫酒店，情急之下仲冒險致電黃牛黨查詢，一間不到兩百呎的二、三星酒店，索價$3,000晚，忍唔住駡此黃牛真夠「黑」，誰不知黃牛阿姐直言：「唔係我哋黑，係囤房嘅人將房價炒高晒。」
此金融大姐甚為氣結，遂向其富豪級友人打聽，到底如何訂到檢疫酒店呢？咁，除咗有錢，仲要識酒店老細，否則就真係識你老鼠喇。
她說：「西環嗰間181酒店，要識個老細，係family friend咪book到囉。」
廖創興多得祖先保佑
一查之下，呢幢位於西環尾、開張兩年多的181酒店，原來由西環地頭蟲廖創興企業（194）持有，祖籍潮州的廖氏祖先廖寶珊發跡於西環咕哩碼頭，後人十年前申請將寫字樓改建為酒店，Covid肆虐之下開張，食正檢疫條水，真多得祖先保佑。家陣有間檢疫酒店在手，富豪都特別有面子，想訂酒店就要講「交情」喇。
另一間位於紅磡的檢疫酒店都係要靠「guanxi」㗎，就係郭鶴年家族旗下嘅嘉里酒店，原來訂房又係有特別渠道。
傳嘉里酒店留房予養和
聽講內部預留咗啲房間，畀養和嘅名醫們，如果係名醫嘅熟客仔又有交情嘅話，醫生都可以伸出援手嘅。
了解完檢疫酒店背後 ，發覺都係洋人管理的置地文華東方及金鐘Conrad網上訂房情況透明度較高。
呢位返IFC寫字樓嘅金融大姐，慨嘆香港防疫政策「趕客」，眼見樓下一間金融機構又退租，準備移到新加坡，始知IFC租金由$210/呎跌至$150至$160 ，一班老外金融行家亦執定包袱往星洲去。咁，香港係咪相形見絀呢？
密切留意BossMind動向！立即CLS
Powered by Mercury
