雅虎香港財經 Bossip｜滙豐設黨委勝過粒「風水米」｜Louise
上星期講班金融佬謝曬皮， 有商家佬補充，連風水佬因返唔到大陸睇風水都賺少好多，佢話：「 咁嘅大形勢，任你風水佬擺個咩陣，都幫唔到幾多喇 ！」昔日好景時，闊佬都有兩、三位「風水國師」傍身，一年顧問費動輒七位數！
正所謂「風水佬呃你十年八年」，係時候檢視一下七年前插喺皇后大道中嗰粒「風水米」。翻查2015年滙豐（005）股價在$60左右徘徊已經夠絶望，家陣升返去$50已叫做還得神落。兩年前門口隻獅子被燒到留下烙印，聽風水佬講已經破晒個局，前年爆疫更冇息派，似乎呢粒「風水米」唔多work。
正牌國師駕臨指導
上星期《金融時報》爆料，滙豐前海子公司已安插咗黨委入內，成為國際金融大新聞。保險出身的滙控主席杜嘉祺（MarkTucker），話要重返亞洲大做中國財富管理業務，咁有個黨委作「指導員」，呢啲正牌國師的確係勝過風水佬。最近亦聽到，中銀有位黨員的高層即將卸任，將加入馬會做全職大董，「指導」香港呢家最有錢嘅慈善機構。此乃新香港、新氣象也。
大股東冇得指手劃腳
安插「國師」乃是權宜之計，持有8.23%滙豐的平保（2318），4月份曾向香港金融界老手取經，此高人問起小妹點睇分拆滙豐亞洲業務呢？即時反應答：「 搣咗最賺錢嘅出來，歐洲件豬頭骨搵你要咩？鬼佬一定唔肯過你啦。」疫情肆虐下，前年英倫銀行禁滙豐派息，平保「蛋家雞見水唔得飲」已夠谷氣，最老鼠拉龜嘅係喺國際金融媒體上無話語權。
有過百年歷史嘅英國《金融時報》 力陳滙豐分拆亞洲業務弊多於利。金融老手透露，阿爺最怕滙豐喺海外損手爛腳，話晒好多香港人嘅身家性命財產都繫於滙豐及其子公司恒生（011），但滙控因遷冊去英國受英倫銀行監管，而且滙豐銀行章程無單一大股東，銀行由管理層話事，平保即使叫做最大股東都未能左右大局。事實上，以往滙豐衝出海外東買西購多焦頭爛額，如美國海豐銀行、Household、美國次按及歐債危機等等都損失慘重。下星期公佈中期業績，看俄烏開戰後，歐洲嘅業務會否損手爛脚。
借錢助大鱷狙擊港元
近排條金融小鱷Kyle Bass出來唱淡港元眨值四成，更加觸動阿爺神經，金管局接港紙接到手軟，連「白頭任」都要出山發聲，令人憶起25年前的炎夏，「任一招」如何挾高息至280厘以擊退大鱷索羅斯。有一筆帳又不能不重提，就係當年滙豐有份借錢畀大鱷狙擊港元。呢筆帳通通記錄在《金融市場檢討報告 1998年4月》之內，當年「任一招」還特意去信特首及各銀行以表不滿，寫道："LAF（流動資金調節機制）should not be abused by banks for the purpose of funding speculative short Hong Kong dollar positions." 25年後，有「國師」昅住，滙豐又點會唔生性呢？
Louise
註：專欄作家言論不代表本網立場
密切留意BossMind動向！立即CLS
Powered by Mercury
