雅虎香港財經 Bossip｜英鎊狂瀉未見底 揸住層倫敦樓 先捱一棍｜Louise
英國換首相後，英女王隨後兩腳一伸，英鎊就跌崩盤。本周初，做trader的金融老友，傳來風聲鶴唳嘅消息，話收到風啲prop trader大舉沽空英鎊，英鎊free fall未見底。嚇到班揸住英國磚頭嘅朋友腳仔軟，嘩！會唔會上演索羅斯92年Big Short英鎊一幕呢？唔會囉，因為英鎊跌至37年嚟新低。
一班揸咗英國樓嘅姊妹立即「圍爐」，如何應對好呢？小妹英國層樓，一年之間供樓利息由兩厘升到四厘多，借咗七成半，唯有安慰下自己，當short咗英鎊心理上好過啲，有姊妹趁英鎊低，唱錢提早還mortgage，有啲就醒目，去年喺英國滙豐，攞到5年定息1.8厘，起碼呢幾年唔愁加息，有個仲精明，上月先殺去英國喺Zone 4 Colindale，唔捱貴息All Cash買樓，單係計滙水，就平咗兩成。
喺加息兼滙率狂瀉下，唔慄就假，不過最緊要有租客，當初隔山買牛時，死都要揀倫敦，諗住樓價跌起上來，大都會物業都頂得住，風急浪高環境下就見真章。以下是我的英倫租樓印記：
舊年初爆Covid，人人話要搬離倫敦市中心，去偏遠地方住，我層樓雖然喺倫敦Zone2，但都要面對現實，平少少租都算喇。一房，叫£1800無人問津下，遂減至£1700，租俾個24歲巴西仔。呢個巴西仔同老婆，去年5月份英國通關後就落腳搵地方租，佢做IT……咩iOS development，總之年薪有6萬鎊，間公司就喺我層樓附近，踩單車返工都得。
其實我肯租俾佢，都有些少屈就，因為佢係英國冇租過屋、冇credit，通常要收一年租，但見佢有份企理嘅工，公司又幫佢搞移民，照計唔會搞花自己個底啩，咁就殺啦，逐個月收租。
巴西仔準時交租冇麻煩嘢，算托賴。老實講，要我住呢層倫敦樓都住唔起，又要交Council Tax，又要交水費、電費，尤其係heating，我呢啲大媽都要靠小鮮肉幫我供樓呀。巴西仔同老婆住咗一年，有咗credit後就飛起我喇，話想住平啲儲定錢生仔，咁我又要搵新租客喇。
喺OpenRent睇到，小妹樓上個單位都放租£1950，即管加租到£1900試試水溫。哇，一登廣告兩日，已有六、七台客約睇樓，應接不暇，要停咗個廣告。姊妹發現附近一房單位已叫租至£2100，要不要再叫高些，但好租客緊要啲。最後俾我揀到另一個小鮮肉租客，呢位26歲強國男孩，喺英國一間知名則樓做助理則師，不過人工得4萬鎊一年，幫我搞租務嘅老友話：「大陸人財來自有方，叫佢一次過prepay 6個月租金，起碼袋咗先吖。」哈，條𡃁仔一口應承，仲驚我唔租俾佢。
吖，自high吓先，倫敦即係倫敦，唔愁租。兩次租樓嘅經驗，顯示英國真係吸引到世界各地嘅年青人，就好似以前嘅香港咁，有來自五湖四海的expats租住中上環、灣仔咁，但一切俱往矣。小妹層倫敦樓嘅租客，都係事業搏殺期之年青人，只嘆英國佬從全世界吸引人材的確有一手，都係嗰句，人材唔係「搶」就有嘅。至於倫敦呢件磚頭，英鎊大瀉下，預咗要捱一棍先，最緊要有租客陪住捱。
Louise
https://www.facebook.com/louisewong15
註：專欄作家言論不代表本網立場
密切留意BossMind動向！立即CLS
Powered by Mercury
