Bossip｜金融巨頭甩底有苦衷｜Louise

幾位金融巨頭甩底金融峰會，Beyond首歌「俾面派對」都幾應景。咪話唔俾面，面子係唔值錢嘅，有錢搵的話，呢啲金融巨賈「刀邊嚐蜜糖」都肯制，何況係Covid。輸緊錢嘅話，股市都唔想睇喇。

臨尾縮沙嘅係資本集團（Capital Group）主席兼CEO Timothy Armour，身體不適咁話。好幾年前，Capital Group一致睇好大陸科技股前景，同ATMXJ班管理層關係緊密，瞓身投入去中概股，係入面做嘅人都「上晒頭」，向身邊友好唱到騰訊（700）會升到800蚊，又睇好隻喺美國掛牌嘅東南亞騰訊Sea Limited（SE），2021年中股價喺250美金時，仍唱到會升到400美元，當然現時只跌剩50美元左右。

不過去年底，呢位老友已謝謝地，指公司對中國大陸睇法已轉，謂大陸嘅政策市下難以預測，已掟晒手頭中概股。又係嘅，俾你估到嘅就唔係「政策」喇。上周跳船去花旗國嘅龍湖集團（960）主席吳亞軍，Capital Group 都揸住4.82%。

巴克萊Barclay's甩底就好正路，因為生意都唔係度。五年前Barclay's私人銀行業務都已經撤出香港，賣咗俾新加坡銀行。舊年Barclay's私人銀行重整旗鼓，不過落腳地係新加坡而唔係香港，主力招呼東南亞嘅超級富豪。所以話，Barclay's CEO過門不入，也別眼紅了。

至於黑石Blackstone，曾經都同中國好親密，2007年梁錦松做其大中華主席時，此美資私募基金上市，吸引到中投落疊做股東，只可惜上市冇耐就金融海嘯，中投即時坐艇，至2018年先甩晒手頭Blackstone股份，賺與蝕就冇交代喇。

過去Blackstone擁抱中國故事，特別係北京房地產，同安邦、海航都有過好多sexy嘅交易，單單如魚得水。不過，自從實行共同富裕，遊戲規則都變喇。

好似舊年SOHO中國（410）潘石屹及張欣兩公婆想將手頭近五成半股份，以每股$5全數賣俾Blackstone金蟬脫殼，最後被阿爺落閘叫停，仲傳出要立案調查SOHO，不過佢哋早已run去美國加州專注其藝術及慈善嘅工作。今年9月，潘石屹更辭去SOHO中國主席職務，成為內房老闆走出去之先鋒。

去年恒大（3333）爆煲，揸重房地產嘅Blackstone遂成為外媒焦點。上周公佈第三季業績更唔見得人，淨利潤得370萬美元，較去年同期大跌99%，仲傳出被美國司法部調查，涉違反反壟斷法，影響美國企業董事會。咁，仲邊有心情嚟香港呢？改由條𡃁首席財務官Michael Chae嚟「戥腳」。

同樣都係black嘅貝萊德Blackrock，就好似滙豐、渣打嘅巨頭俾足面，由總裁Rob Kapito出席，事關Blackrock舊年係大陸獲發牌，成為第一家可以全資控制的互惠基金，咁又點可以唔俾面呢？

Louise

https://www.facebook.com/louisewong15

註：專欄作家言論不代表本網立場

密切留意BossMind動向！立即CLS

FB Instagram Youtube

Powered by Mercury