CFO財報解密│雙櫃檯交易反映港股疲弱因素（Benny）

港幣—人民幣雙櫃台模式下，投資者可以用人民幣買賣港股。 (Bloomberg Creative via Getty Images)

港股啱啱喺6月19日星期一，推行港幣—人民幣雙櫃台模式，投資者可以用人民幣買賣港股。暫時有24隻港股被納入雙櫃台名單，當中包括股騰訊（700）、阿里巴巴（9988）、中移動（941）、中海油（883）、比亞迪（1211），都係平時最多成交量、最大隻嘅熱門股。

下載Yahoo財經APP

美股外幣即時報價 多國新聞任睇

喺雙櫃台模式下，同一隻股票無論喺人民幣櫃台定港幣櫃台買賣，佢哋嘅持股權益基本上係無分別。唯一分別係人民幣同港幣會有滙率波動，而兩個櫃台間係無股價掛鈎，所以人民幣櫃台股價完全由市場供求決定，而比較港幣櫃台嘅同一隻港股股價可能就會有差異。但同時因為同一隻股票可以進行跨櫃台交易，即係人民幣櫃台買入，港幣櫃台賣出，所以差異唔會太大。而現行互聯互通，即係俗稱北水嘅國內南下資金暫時未可以用人民幣櫃台買賣港股。

所以呢一刻推行雙櫃台模式即時嘅理論效果係：疲弱嘅港股可以直接擁抱境外人民幣資金池，藉此提升港股價值。

實際交易情況

以雙櫃台模式第二日，即係2023年6月20日上午交易情況睇， 24隻雙櫃台證券，竟然有16隻係100萬成交額都無，其中有4隻——新地（016）、華潤啤酒（291）、快手（1024）同京東健康（6618）人民幣櫃枱直情拍晒烏蠅，成個上晝零成交。

當中叻仔啲最大成交量嘅中海油（80883），約有80萬股成交，成交金額約人民幣800萬；中移動（80941），有57萬股成交，成交金額人民幣3350萬；就算係騰訊（80700）都係只有4,200股成交，涉資人民幣140萬咁大把。而成個雙櫃台總成交額有人民幣6,000萬多啲啲，即係中移動成交額已佔50%人民幣櫃台成交資金。

相比之下港幣櫃台相同證券，中海油（883）有 2,270萬股成交量，港幣2.6億成交額；中移動（941）成交量434萬股，成交額港幣2.8億；騰訊（700）成交量679萬股，成交額港幣24億，成交量同成交額都多過人民幣櫃台好多倍。

根據金管局數據，2023年4月底香港人民幣存款有8,300億，即係成個市場有8000幾億人仔但連1億（8000份之1）拎嚟玩吓港股人民幣櫃台都唔捨得。

核心因素

有雙櫃台對港股無錯係好事，因為可以免除境外持有人民幣投資者嘅滙率風險去買港股，變相可以令港股市場面向龐大嘅境外人民幣資金。但實際交易數據可以睇到，市場反應好一般，只係為每日千零億港幣成交額嘅港股市場額外增加多億零嘅成交額（即係0.1%）。

整體人幣民櫃台交易額咁少，而有一半係買緊中移動都則面說明咗一個現實問題：港股疲弱唔係資金exposure唔夠大，境外人民幣資金exposure夠大啦掛，但都反應冷淡。港股市場整體核心問題係夠唔夠多優質、基本面好、有潛力嘅股票，持續吸引資金流入、長期停留、增持？

點解中移動佔去人民幣櫃台一半成交額？就係因為呢個時勢，市場鍾情嘅係高息、穩定增長、受政策影響最細嘅國企，但呢類股份真係唔多。所以其實要帶起個股票市場暢旺，最核心係要有多啲基本面優質、經營有前景，有長期持續嘅政策支持嘅股票，咁境外人民幣就算本身無得買港股，都可以喺市場兌換港幣買，唔需要等雙櫃出現先去買港股。

即係日股咁爆，係唔需要等日股有日圓同外幣多櫃檯模式先識爆。

Benny Yam

執業會計師

Facebook：https://www.facebook.com/cfobenny/

Patreon: https://Patreon.com/Cfo_benny

本欄隔周三刊出