CFO財報解密│恒大危機 顯事前風險管理重要性(Benny)
呢個係一篇苦口婆心嘅文章:恒大地產高管被中證監裁定涉嫌財務造假。但呢個來自官方嘅指控,足足距離恒大首次被指有債務危機已經過咗兩年有多時間……當中可能已經有股東、債權人蒙受難以追回嘅投資損失。當然監管機構需要時間蒐集證據、調查以及分析,先可以作出負責任嘅指控,所以喺呢一刻先有呢個結果亦屬無可厚非。
美股外幣即時報價 多國新聞任睇
睇年報係基本嘢
所以我經常鼓勵大家喺投資股票時,除咗睇前景外,最緊要嘅係自己做好事前嘅風險管理。而最基本嘅梗係睇上市公司年報、招股書。
你可能會覺得呢啲文件相當複雜同專業,未必睇得明。所以我今次分享嘅都係最簡單睇有冇表面傷痕。如果連呢啲表面傷痕你睇完都覺得唔舒服嘅,咁喺你投資前就要再諗清楚啦。
1. 風險因素章節有啟示
第一當然係睇佢哋嘅風險因素章節,全部都係文字冇數要計,但就講述咗上市公司經營上面對嘅主要風險。呢啲風險平時你好難喺媒體或者管理層口中聽得到,但就係一啲好實在喺經營上會發生嘅問題。睇完通常會將你對佢前景嘅興奮感覺嚟一個中和嘅效果,即刻令你醒一醒,萬試萬靈。
2. 經營現金流VS利潤
如果一間上市公司年年都賺好多利潤,但係經營現金流同利潤差好遠,已經係一個警號。代表佢好大部份利潤都唔可以實現真正嘅現金,流入公司銀行戶口,係賬面數嘅利潤或者係現金管理不善。久而久之,成本費用不斷要使錢嘅同時,收入、利潤冇錢返,咁幾好嘅公司都會最終捱啱住。
3. 應收賬餘額VS收入
另外一樣嘢就可以睇吓間公司確認咗收入後客戶仲未找數嘅金額(即係應收賬款),會唔會仲大過全年嘅收入金額?如果會嘅話就可能有啲客戶拖咗超過一年數都未肯找錢。咁呢間公司你就要考慮吓佢嘅經營模式合唔合理?點解可以咁耐都未收到錢,定係又係賬面數呢?
4. 存貨餘額VS銷售成本
原理同應收賬款大過銷售收入類似,當你手上面嘅存貨金額仲大過你全年賣出去嘅存貨成本(即係銷售成本),代表間公司嚟緊可能要用一年時間,先至可以賣晒手上面未賣嘅存貨。咁你又要再問吓呢間公司究竟係做緊咩業務?點解要咁耐先賣得出嗰啲貨物呢?定係佢手上面啲貨根本唔好賣,需要做減值?
5. 管理層說法邏輯性
另外一樣好重要嘅就係睇管理層嘅業績說法,究竟佢哋分析業績表現係一啲好虛嘅說法定係有實際數據、商業邏輯支持?係暫時性嘅倒退定係Fundamental嘅轉變?
當然管理層說法虛實,風險因素問題大細,甚至乎係一啲客觀財務數據點樣先叫差?呢啲都係因應每個投資者嘅觀感而有所分別,冇絕對標準。
所以去到最後嘅風險管理動作,就係你需要有一個獨立嘅邏輯思考,問自己究竟喺你眼中覺得有冇問題?你買咗呢啲股票後會唔會坐得舒服?唔係投行、財經新聞去幫你判斷,因為你係用緊自己嘅資金去買呢啲公司股票、債券。
就正如股神巴菲特低位買入台積電,但係喺好短時間內就已經清空咗佢嘅持股。因為佢覺得有啲風險令佢坐得唔舒服,所以佢唔需要理市場其他人嘅操作,而係根據自己嘅風險評估去決定坐定唔坐。
Benny Yam
執業會計師
本欄隔周三刊出