CFO財報解密│2024美股主旋律︰AI大戰聯儲局（Benny）

2024美股主旋律︰AI大戰聯儲局AI科技發展方向，除咗由雲端大型數據中心提供AI算力外，唔需要連接雲端數據中心嘅個人移動電子設備都將會係AI產業鏈嘅最新發展方向。 (Feodora Chiosea via Getty Images)

2024年第一個星期美股整體回調，尤其是科技股、芯片板塊：Nasdaq累跌2%、費半指數累跌3.7%。一來2023年11、12月升得太多要獲利止賺，二來市場對減息預期降溫。但踏入2024年第二個星期，上面講過指數都即刻全部顯著回升，芯片股王Nvidia (NVDA)更係一晚之間股價衝破歷史高位。呢個景象顯示AI發展同息口走勢可能就係2024年美股發展大方向嘅縮影。

下載Yahoo財經APP

美股外幣即時報價 多國新聞任睇

AI-enabled PC或是轉捩點

一年一度嘅消費電子展（CES），1月9日啱啱喺美國拉斯維加斯開幕。芯片大廠Nvidia、AMD、Intel都會趁機推出最新、最快AI芯片。仲有透明顯示器、 Human Presence Detection、AI-enabled PC等等；而當中AI-enabled PC，代表住AI科技發展方向，除咗由雲端大型數據中心提供AI算力外，唔需要連接雲端數據中心嘅個人移動電子設備都將會係AI產業鏈嘅最新發展方向。

呢個亦都可能係令個人電腦PC、智能手機市場能夠擺脫近年疲弱需求嘅一個轉捩點。因AI-enabled將會俾到消費者最好嘅理由去換新機、新PC。所以成個AI產業鏈，由上游芯片設計、製造、封裝、再到數據中心、Gen AI 軟件開發、AI-enabled Device硬件都會持續高速發展，而且會不斷推出令市場驚喜嘅AI科技新產品，刺激市場資金追捧。

一年一度嘅消費電子展（CES），1月9日啱啱喺美國拉斯維加斯開幕。芯片大廠Nvidia、AMD、Intel都會趁機推出最新、最快AI芯片。 (Ethan Miller via Getty Images)

聯儲局減息步伐左右大市升勢

同時，金融市場資金極度敏感，縱使Gen AI發展好真實，但聯儲局利率政策、美國經濟進展喺2024年都一直會左右美國股市發展。好似上星期五公佈嘅美國勞工市場數據，睇落表面強勁但內裡暗藏危機：非農數據大超預期，失業率又維持低位3.7%，但ISM服務就業指數就大跌，都令人感覺美國經濟暗湧處處。

嚟緊月尾聯儲局又會開會議息，最新就業數據畀到聯儲局官員嘅感覺，究竟係勞工市場依然好有韌性定係開始走弱？佢哋2024年減息進程時間表有無調整都好難講。如果維持上月嘅減息3次就代表市場最近減息6次預期興奮過頭，股市會有回調壓力；而如果聯儲局係更進一步釋放經濟放緩訊息，又會唔會令市場擔心衰退即將降臨？

聯儲局官員取向好難估，就等如佢哋覺得加息減息，令通脹降溫之餘又唔傷害經濟，嘅程度好難拿捏一樣，都係見步行步。AI發展一定係持續、快速、有前景，亦都將會係長遠經濟增長嘅重要動力，呢個大方向係唔會改變。但短、中期嘅勞工市場變化、經濟進展、通脹、地緣政治都係好難預判；而最緊要嘅係聯儲局對拿捏利率水平準繩度嘅高度不確定性，都提醒我地2024年都必將注定係大起大落嘅一年。

Benny Yam

執業會計師

Facebook

Patreon

本欄隔周三刊出