CFO財報解密│AI PC真係前景無限？（Benny）

市場對AI PC十分期待，預計持續驅動2025年業績增長。 (Andrey Suslov via Getty Images)

聯想集團（992）前日股價一度升超過10%，除咗因為最新2024年Q1總收入同比升9%、經營利潤大升68%、全球市佔最大嘅個人電腦業務（智能設備）收入升7%外，最令市場奮興嘅係對AI PC嘅憧憬，預期佢個人電腦業務，因為AI PC元素會持續驅動2025年業績增長。

下載Yahoo財經APP

美股外幣即時報價 多國新聞任睇

今年首季PC銷量仍要跌

根據4月8日嘅IDC市場調查報告，2024年Q1全球個人電腦出貨量5,980萬部，同比增長1.5%，係兩年以嚟首次錄得同比增長。但IDC都補充多一句：「2024年第一季增長好大原因係同比基數太低所致。因為2023年嘅Q1出貨量，當時同比係大跌28.7%，係個人電腦業歷史低點。」

望番聯想嘅業績，2023年Q1個人電腦業務收入98億，亦係自2020年以嚟近3年最低水平。所以面對住低基數效應，2024年Q1嘅收入增長難度就顯得唔大，但其實都只係得個位數嘅7%，並唔係強勁增長嘅勢頭。

而如果拉闊少少睇，將2024年Q1個人電腦收入環比上一季2023年Q1，其實係下跌緊15%，就算比較最近四季表現，2024年Q1都係最低收入嘅一季。所以個人電腦業務呢一刻並唔係市場氣氛感覺一樣，開始持續增長嘅勢頭，而只係見底後嘅反復升跌mix情況。

AI概念非所有板塊受惠

有AI光環加持嘅產品呢刻當然特別受市場關注，但實質上AI概念並唔係每個板塊都會真正受惠。

幾乎包攬全球所有AI芯片代工嘅台積電管理層，喺4月尾最新業績會就有以下見解：「智能手機市場有復甦但唔快速；PC已見底但復甦緩慢；但AI相關數據中心嘅需求非常非常強勁。」分析師當時亦都好想知AI PC、AI Smartphone會唔會因為AI而有一股換機潮？而台積電管理層嘅回復相當保守：「Edge device如果有replacement 當然係好，但而家未睇到，但相信會有。」

AI PC 、AI Smartphone似係喺連接唔到雲端時，提供用戶一種方便性嘅工具，但真正強大嘅AI算力依然係喺雲端。 (iambuff via Getty Images)

分析師喺Google業績會問：「點樣睇冇連接互聯網嘅終端設備發展潛力？Pichai答到個AI核心價值：「其實用戶係搵緊一啲佢哋可以同外面連接嘅資訊同功能， 有啲情況當然可以喺你部終端機上面做到，但大部份用戶係想要雲端數據嘅多樣性同豐富性。「a lot of what people are looking to do, I think you will need the richness of the cloud, the webs……」 其實佢講得好合理，你要有人工智能超級運算功能同數據，一部小小嘅移動終端機（AI Smartphone、AI PC）始終無得同數據中心（Data Centre）比。AI PC 、AI Smartphone似係喺連接唔到雲端時，提供用戶一種方便性嘅工具，但真正強大嘅AI算力依然係喺雲端。

所以AI Edge Device似係一個AI產品嘅延伸，呢一刻AI PC係一個市場嘅熱潮，好好嘅憧憬工具。但當時間推演落去時，AI PC可唔可以革命性地引發一個大型換機潮，就真係未知之數，因為重點係On-cloud，呢個值得我哋留意同記住。

Benny Yam

執業會計師

Facebook

Patreon:

本欄隔周三刊出