雅虎香港財經 FI專欄｜學嘢想請教人哋，你又知唔知點樣問問題先係最好？｜嘶憶
1. 大家有冇諗過，點樣學嘢快啲、學得通透啲？
2. 好奇心，人皆有之。冇人係唔鐘意學嘢嘅。坊間講嘅所謂「唔係個個人鐘意學嘢」，係將「學嘢」和「讀書」混為一談。「世事洞明皆學問，人情練達即文章。」讀書、打機、玩運動、去旅行，無論你做乜都好，皆有學問。
3. 唔知大家有冇一個感覺，就係好似學極啲嘢都仲係一舊舊咁，識啲唔識啲？到以為自己好熟一樣嘢時，畀人問一問，當堂發覺其實自己冇想像之中咁熟一樣嘢？
4. 呢個係一個我思考咗好多年嘅問題，而同時係一個好根本嘅問題─究竟叻人係點樣學嘢嘅呢？假設一個人要不斷學習先生存到，大劉話佢唔識上網但佢都仲生存到，咁佢而家身邊多叻人，畀錢人哋就解決到大部分問題嘛，但佢唔會有時間同你分享喺冇乜錢時，佢整個發跡過程，上網睇到嘅資料，只係一啲好片面嘅歷史。先唔好講大劉咁離地，好似我哋呢一代識電腦嘅，平時上網學嘢又係點樣學嘢？
====
A. 所謂知識，其實就係「道」與「術」的混合
5. 道理何其多，綜合而言，嚟嚟去都係1)重覆、2)精準刻意學習、3)從朋友身上尋求意見、4)以Elon Musk的第一原則(First Principle)理解一件事的根本本質、5)以遊戲方式理解學習等等。
6. 之前我有講過「道」與「術」呢個話題，有興趣可以Youtube聽番。「道」即係「做事原則」(Know-why)，而「術」即係「做事方法」(Know-how)。以上所講的東西，屬於「道」的圍疇。
7. 古語有云：「上人用道，中人用術，下人用力。有道無術，術尚可求也；有術無道，止於術。道為術之靈，術為道之體；以道御術，以術載道。」
8. 意思即係，「上人」做每一件事時都有自己嘅「做事原則」，唔係為做而做，「中人」係叻在自己的範疇裡邊，「下人」只有一股蠻力，做事無邏輯可言，做錯多過做啱，亦不能從錯誤中學習。先學懂做事原則，之後再學做事方法都未遲。有道無術，有「通才的思維」，尚可慢慢發展成為「專才」繼而成為「全才」，有術無道，止於一個「專才」，去到一個自己唔熟悉的範疇裡邊，就好似一個白痴咁樣，貽笑大方。坊間的所謂專家在自己不熟悉的範疇獻醜例子多不勝數。
9. 以上嘅說話，用番五歲細路仔都明白嘅邏輯去講，即係話：「做乜唔緊要，最緊要知道自己做乜」。
10. 做人呢，又未必真係下下都係要去到，唔識一樣嘢就唔可以搭嘴嘅，人家係呢件事上係專家但你係新手，咁你咪畀人哋「演下嘢」，表現下，反之亦然。至於你吸唔吸收到人哋獨門功夫嘅精髓，其實都好睇你問問題嘅功夫。
11. 識問問題嘅，聽君一夕話，勝讀十年書；唔識問問題嘅，人哋聽你問多兩問都唔想應你機，又或者敷衍下你就算。做人咩都識少少係最理想，只係唔好「扮代表」。
====
B. 向其他人學習，應該「道」與「術」兼收
12. 詢問「其他人係點樣學嘢」呢個問題，即係問緊人哋「做事以及決策的原則和方法」，亦同時代表問緊人哋：「你見到某個問題嘅時候，個腦第一時間會浮起一啲乜嘢意念？五感會有乜嘢反應？究竟係「成堆生字喺個腦」、將意念圖像化、「嗅」到味道、「品嚐」到味道，定係直情有埋「觸覺」？」
13. 關於呢樣嘢，我真係好想知，所以我喺到諗，呢個世界，有冇一個服務，就係俾錢一個人之後，我可以喺佢身邊睇佢點決策、點做嘢，知道晒佢一日會遇到乜嘢問題，而佢又會用乜嘢原則和方法去解決？
14. 呢個又涉及私穩問題，搞唔掂，而如果其他人知道你監視緊佢做嘢，佢又唔會咁放心「露出本性」。
15. 市場上都有類似嘅Gimmick嘅。舉個例，股神巴菲特慈善午餐拍賣大家應該聽過，啲人會畀幾千萬，甚至過億港紙，就係為咗同股神食一餐午餐，為嘅，就係股神的「金石良言」。另外，坊間亦有一啲「一日CEO」活動，畀參加者感覺CEO一天的工作係如何。都，好似仲差咁啲嘢。
16. 另一種做法，就係傳統教科書式的畫圖，畫Mind Map。畫Mind Map都仲有一個問題，就係幅圖唔識郁嘅。我畀晒成幅圖你睇，你未必知由邊到開始畫起。左邊開始？右邊開始？中間開始？上邊開始畫？定還是係，喺下邊開始畫？都，好似仲差咁啲嘢。
17. 再貼近少少做法，而家，都有唔少Youtuber做嘅教學影片，係由零開始畫一個概念畀大家知道點解一個題目，但，都好似仲係差少少嘢，好似都仲係一啲跳Step，唔能夠照顧所有用家的需要。都，好似仲差咁啲嘢。
====
C. 以探險家角度學習，捉住「書到用時方恨少」的感覺來學習
18. 如果，我再將學嘢呢件事再簡化呢，學習嘅本質，就係「強化已知」和「了解未知」；學習，就係「山洞探險」嘅過程。
19. 喺入呢個山洞之前，學生與導師的身份既是探險家，亦係同行者，大家同時將自己嘅既有知識暫時「動態清零」，進入「蠢材狀態」，無分高低。之後，大家就進入一個「未知」的山洞進行探險。學習知識本身，就係一個擴闊世界觀嘅過程。如喺學習一樣嘢之前，就經以以自己所累計嘅知識形成一個既定立場，睇嘢注定會有盲點。
20. 經過山洞，我哋會遇到唔同嘅「怪物」，當遇到問題(怪物)時，我哋要睇下手上邊有甚麼工具對付佢。喺應付怪物嘅能力分野上邊，學生與導師的最大分別，就係導師身上有一啲學生暫時冇嘅思考工具，當學生見到隻怪物搞唔掂，遇到「思維困擾」、「書到用時方恨少」嘅感覺時，就係導師出手嘅時候。導師就好似「叮噹」咁，能夠適時引導學生去試下用某啲工具應付面前的怪物。之後，學生就會從過程中學多咗一種工具嘅用法。我只係將Elon Musk的說法，用番中文去解釋。
21. 到要用到嗰樣工具(Past Paper)時，我再解釋畀你聽點解要用呢樣工具(CG Concepts)，點樣用(Exam Techniques)，喺甚麼其他情況可以用同樣的工具(For Future Exam Questions)。傳統教育方式最大的弊病在於，我一嚟就一次過曬冷同你講晒「你有一百樣、一千樣工具可以用」，咁係無意思，因為冇代入感。用到嗰樣工具就教嗰樣，係最理想方法。都，好似仲差咁啲嘢。教學最緊要係有互動，換個說法，即係，有啲嘢，唔係「Zoom教學」所能取代「面授」嘅。
22. 用到嘅嘢先係自己嘅。你教唔識人，教完之後都淨係你自己識，唔洗幾年呀，幾秒鐘後未落堂都畀番晒導師了。所以呢，教學最應該講求嘅係知識轉換率(Knowledge Conversion Rate)，而我呢幾年嚟，其實就係一直研究緊「道」，無乜點樣真正實踐。
====
D. 成為「全才」前，亦應建立自己的專長
23. 「有道無術，術尚可求也。」而家我搞嘅HKCGI Corporate Governance企業管治公會試雞精班，除咗係一個可以用嚟搵錢的方法之外，同時亦係一個「修羅場」，將我呢幾年嚟所累積到的「道」與「術」合二為一。
24. 如果我呢一套行得通，理論上拎嚟學文本類知識都可以用類似的方式學習。以上所講嘅嘢，亦即係「見到某個問題嘅時候，個腦第一時間會浮起一啲乜嘢意念」的東西，其實用四個字以表達得晒，就係《刻意練習》一書作者所講嘅Mental Representation (心智表徵)。
25. 如果考試Syllabus話要CG呢一科考試合格要溫夠200個鐘，你上完我堂之後，都仲係要200個鐘嘅話，咁我應該檢討下我自己嘅價值喺邊到。所謂嘅200個鐘，應該係學生和導師所付出嘅時間總和，而導師應該佔的比重應比學生多。你上堂已用了36個小時，而我又用了36小時，咁仲有「128小時」。
26. 不過，講又咁講，如果你係真係想理解呢科深入啲，擺多啲時間落去都可以，合格以上，都仲可以有其他追求嘅，用CG角度理解Com Sec Compliance工作和Corp Law都係一個唔錯的切入點。
27. 今個Exam Diet會考Corporate Governance企業管治呢一科的朋友，而又有興趣報名上Face-to-Face Group Tutorial的朋友仔，可以搵我拎第一堂的PowerPoint筆記睇下。價錢貴過某學院，但我收得呢個價錢就唔會畀啲垃圾你。
註：專欄作者的觀點不代表本網立場。
Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen
