KingSir傾樓│如果有一百幾十萬 我建議你盡快買層樓(葉景強)
美股、外匯、加密貨幣免費即時報價,自選投資組合獲取相關新聞提示。
上星期,筆者在地產課堂完結時,有學員對我說,今年是復甦年,經濟應該會越來越好,近日股市由高位31000點回調至28000點,好像是入市時機,加上很多分析員都認為今年股市應該有15%至20%升幅。相反,市場一般都覺得今年樓市最多都係升5%至10%,而家是否應該買股票好過買樓呢?而我的答案是「看你口袋裏有多少錢!」
如你副身家只有三、四十萬,連買樓首期都唔夠嘅話,我建議你可考慮買一些博經濟復甦的「舊經濟股」,如銀行、零售餐飲、地產收租股等,希望今年股價上升,可以幫你儲夠上車的資金。但如果你手頭上已有一百幾十萬的話,我建議你盡快買層樓,賺得將會更加多。
然而,同學十分質疑我的建議,他說如果今年股市會升得比樓市好的話,點解仲要去買樓呢?
槓桿與風險 視乎買咗乜
我回答說,假如你有100萬,你應該留返10萬作應急錢,攞其餘的90萬去買股票。今年經濟復甦,我就當你一年有兩成升幅,一年後你就賺到18萬。而同一筆錢,一樣留返10萬作儲備,但用餘下的90萬就可以買到一層630萬的住宅物業(首期63萬+印花稅18.9萬+1%代理佣金6.3萬+律師及雜費約1.8萬=90萬),我就當你一年只升5%,一年後你副身家就多咗31.5萬,比投資股票多咗13.5萬,但如果咁好彩升10%的話,你副身家就多咗63萬,比投資股票足足多咗45萬。
同學繼續追問,買樓賺多咗錢係因為按揭有槓桿,雖然回報高咗,但風險一樣高!我說你又錯了,槓桿會否帶來風險那就要看你買甚麼。
如你買大藍籌,一般經紀行可以畀你槓桿多一、兩倍,槓桿後回報可以由18萬升至54萬(未計孖展利息),但投資可升可跌,如果你唔好彩,股價只要跌一成多,證券行就會立即call你倉,如果你冇錢補倉的話,佢哋就會斬你倉,你就會血本無歸!
相反,你用高成數按揭,以幾十萬買幾百萬嘅樓,講緊成十倍槓桿,如果咁唔好彩樓價跌咗五成甚至九成(其實起今天息低量寬加缺貨嘅時勢,樓價要跌兩成真係有啲難度),但只要你乖乖地每個月準時供樓,銀行都唔會亂call你loan,所以買樓嘅風險不在於樓價跌幾多,而是在於你每個月有冇錢供樓。
因此,只要你認為今年股市和樓市都會升的話,買樓嘅回報將會比買股票高。當然如果你已經借爆晒,買樓完全冇槓桿,連一蚊都借唔到嘅話,買股票可能會畀買樓好。
葉景強(King Sir)
本欄隔周二刊出