KingSir傾樓│想靚價入場 要搵四類放盤業主(葉景強)
上文提到,因今天市場有大量優質靚盤可揀,如買樓目的是自用而份工又無問題的話,現在是可以考慮入市的。而近日港人憧憬中港通關,以及美國加息潮接近尾聲,根據某大地產代理統計,12月首兩星期的買賣成交差不多相等於11月整個月,部分等待已久的用家按捺不住入市,個別減價高質靚盤亦被吸納。作為用家的你,如想在此刻買入劈價靚盤的話,可積極找尋以下四類放盤業主。
美股外幣即時報價 多國新聞任睇
1. 持BNO移民業主
其實移民盤在市場放盤量總體不算多,但他們卻是「去意已決」真心想賣樓的一群,只要有票,他們甚麼價都有得傾,完全係要錢唔要貨,原因是因為如他們在抵英後的九個月寬限期內,仍未能將在港物業賣出的話,他們將要打很重的Capital Gain Tax(計算是以今天賣出價減去當年買入價,相差的盈利將要打18%至28%的税不等,税率按照其收入而定)。所以他們是決心走貨,平啲都要賣。
2. 承繼遺產的業主
自2020年新冠疫情爆發以來,這幾年香港人死得特別多。根據統計處及衛生署數據,過去六年死亡人數急劇上升,由2016年中至17年中的45400人上升至2021年中至22年中的61600人,超過八成死者都是65歲或以上。先人剩下的物業財產,孝子賢孫大多想早分早享受,但在這淡市一客難求的情況下,他們心諗一來啲錢又唔係自己搵返嚟,二來如果屋企人多,除時要分三五七份,就算賣平啲畀你,除返開都唔差很多,重點是最緊要快同你肯買。
3. 先買後賣的換樓業主
部分換樓客藉着樓市下跌時,打算平買平賣換樓,誰知今天市况超級淡靜,出貨極難,但如不能在買入新樓後的12個月內賣出舊樓的話,已交稅局的15%從價印花稅將會凍過水,所以他們寧願平多十個八個巴仙畀你,將層樓盡快賣出,都總好過益政府,計落條數除笨有精。
4. 周身債的業主
任何時間都有人會等錢洗,尤其挨年近晚。臨近年尾,很多人都要清舊債,有些更被上門追債,做生意的要找數或要錢週轉,在這靜市只要有客,萬事都有商量,買到筍盤機會自然高。
葉景強(King Sir)
本欄隔周二刊出